Khu ngăn kuăn pơlê pêi chiâk kong pơlê Dak Lak nếo tơkŭm po klêi tơniăn Hneăng hôp kân mâu kăn teăng mâ roh má 10, hneăng hơnăm 2023-2028, Khu ngăn kuăn pơlê pêi chiâk kong pơlê Dak Lak nôkố ai lối 94 rơpâu ngế. Tung plâ 5 hơnăm hdrối mê hía nah, hiăng ai lôí 137 rơpâu ngế kuăn pơlê ki pêi chiâk pêi deăng hiăng chêh dêi inâi tung hnoăng cheăng “Kuăn pơlê tơ’noăng pêi chiâk pêi deăng, mơdró kâ rơkê, tơrŭm tŏng kum dêi pó pro kro ƀă kơdroh kơtiê tơniăn ton”.

Ai vâ chê 103 rơpâu rơpŏng ki châ dó inâi kuăn pơlê pêi chiâk pêi deăng rơkê dêi rêm râ, mâu rơpŏng ki kố hiăng châ tŏng kum tăng cheăng pêi ăm lối 25 rơpâu ngế pêi cheăng. Hnoăng cheăng Kuăn pơlê pêi chiâk tơ’noăng pêi chiâk pêi deăng, mơdró kâ rơkê, tơrŭm dêi pó pro kro mơdrŏng, ƀă kơdroh kơtiê krá ton” a Dak Lak xuân hiăng veăng kum ăm 11 rơpâu rơpŏng kuăn pơlê châ hluăn ing kơtiê, tơniăn tơdroăng rêh kâ ối.

Jâ Lại Thị Loan, Kăn hnê ngăn kuăn pơlê pêi chiâk deăng kong pơlê Dak Lak tối ăm ‘nâi, tung hneăng ki nếo. Khu ngăn ‘na kuăn pơlê rêm râ kô pơtối thăm mơdêk tơrŭm po mâu hnoăng cheăng tê mơdró, hnê mơhno tối kuăn pơlê mơnhông pêi chiâk pêi deăng, tê mơdró kâ.