Ki nhên, peăng kơxo má, Vi ƀan pơkuâ Kuô̆k hô̆i tơpui tơno ‘na mơ-éa chêh hdrối Pơkâ dêi Kuô̆k hô̆i mơnúa troăng tơleăng tơmeăm ki mơnhên, tơmeăm tung tơdroăng séa ngăn, xăm tối, tơleăng mâu roh tơdroăng, roh tơdroăng xôi kân; séa ngăn tơdroăng rah xo mơngế; tơpui ‘na tơdroăng hbrâ Hneăng hôp má 8, Kuô̆k hô̆i hneăng má XV.

Peăng xêi, Vi ƀan pơkuâ Kuô̆k hô̆i tơpui ‘na tơdroăng tơkêa bro Luât dữh liê̆u ƀă hbrâ hâi khế tơpui tơno ‘na mâu tơdroăng xiâm ki ê. Pôa Trần Thanh Mẫn, Kăn xiâm hnê ngăn Kuô̆k hô̆i tối rơdêi Hneăng hôp má 8 tiô tối hdrối kơxô̆ tơdroăng cheăng tơbleăng Kuô̆k hô̆i séa ngăn, pơkâ hên má môi sap ing apoăng hneăng má XV troh nôkố. Kuô̆k hô̆i kô séa ngăn 39 tơdroăng xiâm, tung mê, ai 29 tơdroăng xiâm ‘na tơdroăng mơjiâng luât, 10 khu tơdroăng xiâm ‘na cheăng kâ – rêh ối pơlê pơla, liăn ngân tơnêi têa, séa ngăn, mâu ngế pêi cheăng ƀă pơkâ mâu tơdroăng ki kal ki ê ối tung hnoăng.