VOV4.Xơ Đăng - ‘’Rĕng ai troăng pro tơniăn tơdroăng pro tơnêi to kơnâ yă, ví pro tơdjâk ‘mêi ton xŏn ăm tơdroăng mơnhông mơdêk cheăng kâ – rêh ối pơlê pơla’’. Kố cho pơkâ dêi khu râ kăn Kuô̆k hô̆i kong pơlê Dak Lak a roh pêi cheăng ƀă Khu pơkuâ loăng pơlái kong kế ƀă kong prâi ‘na pêi pro troăng hơlâ, luât ‘na pêi pro kơdĭng mơdât mơ’nhê tê kơtê, hneăng hơnăm 2016 – 2021 a hâi lơ 13/4.

Khu râ kăn Kuô̆k hô̆i Dak Lak pơkâ thế rĕng ai troăng pro tơniăn tơdroăng pro tơnêi to kơnâ yă

 Tiô Khu pơkuâ loăng pơlái kong kế ƀă kong prâi kong pơlê Dak Lak, xêo 3 khế apoăng hơnăm 2022, tê mơdró ‘na tơnêi tung kong pơlê tâk hên ó ƀă 103 rơpâu roh, tâk vâ chê 200% tâng pơchông ƀă roh kố hơnăm nah. Yă tơnêi xuân tâk tâng pơchông ƀă pái khế mơ’nui hơnăm 2021. Drêng ai tơdroăng kố, Khu pơkuâ loăng pơlái kong kế - kong prâi hiăng ai mơ-éa tơbleăng Viƀan kong pơlê hnê mơhno mâu tơring pơkuâ krá tơniăn tơdroăng pơhlêh xiâm kối xúa tơnêi. Khu râ kăn séa ngăn pơkâ thế, Khu pơkuâ loăng pơlái kong kế ƀă kong prâi kong pơlê Dak Lak thăm pơtâng tối, tơbleăng ‘na luât vâ pêi pro kơdĭng, mơdât mơ’nhê tê kơtê châ tơƀrê.

Tơdrêng amê, tơtrŏng pơkuâ liăn ngân tơnêi têa, kơxô̆ mơngế pêi cheăng, tơmeăm tro tiô pơkâ; tơniăn  pêt mơjiâng tơmeăm, xúa mâu tơmeăm ‘na tơnêi, tơmeăm tung kơdâm tơnêi, têa châ tơƀrê, krá tơniăn.

A Sa Ly tơplôu ƀă tơbleăng