VOV4.Xơ Đăng - Hâi lơ 19/5, pôa Đỗ Tiến Sỹ, Kăn cheăng tung Khu xiâm Đảng, Kăn xiâm pơkuâ Rơ’jíu Việt Nam rơtế khu râ kăn Rơ’jíu troh lăm pôu ƀă chôu nhang a Kơpong tơbâ tơmeăm ton nah kiêp Trầm – hngêi chuô Trầm, cheăm Phụng Châu, tơring Chương Mỹ, pơlê kong kân Hà Nội klăng leh tơbâ 132 hơnăm hâi kot mâ Pôa Hồ Chí Minh, Kăn xiâm hnê ngăn tơnêi têa hneăng apoăng. Kố cho tíu Rơ’jíu Việt Nam mơ’no ‘’Rơkong kơbông krếo lâp tơnêi têa tơplâ xâ’’ dêi Pôa Hồ Chí Minh a kơmăng lơ 19/12/1946.

A leh chôu nhâng, pôa Đỗ Tiến Sỹ rơtế khu râ kăn teăng mâ dêi Rơ’jíu Việt Nam ƀă khu râ kăn pơkuâ cheăm Phụng Châu, tơring Chương Mỹ hiăng chôu nhâng a tíu koh tơbâ xiâm ƀă kiêp Trầm, rơtế vêh tơbâ tơdroăng kal tơkŭm po a hngêi chuô kơtăn kố 76 hơnăm. A roh lăm pôu pêi cheăng ƀă khu râ kăn pơkuâ cheăm Phụng Châu, tơring Chương Mỹ, pơlê kong kân Hà Nội, pôa Đỗ Tiến Sỹ pơtroh rơkong mơnê Vi ƀan cheăm Phụng Châu hiăng kum rak vế Kơpong tơbâ tơmeăm ton nah kiêp Trầm – Hngêi chuô Trầm, tíu Rơ’jíu Việt Nam mơhúa châ pro tíu pêi cheăng apoăng tung rơxông tơplâ xâ tŏng kum tơnêi têa.

A Sa Ly tơplôu ƀă tơbleăng