VOV4.Xơ Đăng - Kơxo lơ 18/5, khu râ kăn séa ngăn dêi Viƀan Luât dêi Kuô̆k hô̆i hneăng má XV xua pôa Nguyễn Trường Giang, Kăn phŏ pơkuâ Viƀan Luât pơkuâ xiâm, hiăng ai roh pêi cheăng ƀă kong pơlê Dak Lak ‘na tơdroăng pêi pro pơkâ dêi luât ‘na pơkâ plâh, pơkâ tơ’nôm rah xo viên chưk pơkuâ ƀă tơdroăng pơkuâ dêi viên chưk tiô inâi tơdroăng cheăng. Xêo troh hâi lơ 31/12/2021 tâi tâng kơxô̆ viên chưk lâp kong pơlê cho lối 37 rơpâu ngế, tung mê hdroâng kuăn ngo châ 12,5%.

Khu râ kăn séa ngăn dêi Viƀan Luât Kuô̆k hô̆i pêi cheăng a Dak Lak

A roh pêi cheăng, khu râ kăn pơkuâ kong pơlê Dak Lak  tối mâu tơdroăng pá puât ƀă pâ thế: Tơdroăng rah xo viên chưk pơkuâ, ki má lối cho a mâu tíu hnê hriâm, khăm pơlât ối trâm hên pá puât, xua ai tơdroăng ki bô bối ‘na pơkâ hnê mơjiâng hnê tơ’nôm khu râ kăn hnê mơhno, pơkuâ tiô tíu cheăng. Kheăn kơdeăn tơdroăng pêi pro pơkâ dêi luât ‘na pơkâ, tơdroăng rah xo, tơdroăng pơkuâ viên chưk dêi kong pơlê, pôa Nguyễn Trường Giang, Kăn phŏ pơkuâ Viƀan Luât dêi Kuô̆k hô̆i xuân tối ăm ‘nâi, khu râ kăn kô tơdah tâi tâng mâu rơkong pâ thế, rơkong tơpui tối dêi kong pơlê tơbleăng Viƀan Luât dêi Kuô̆k hô̆i séa ngăn, tơpui vâ ai mâu pơkâ, ‘mâi rơnêu ăm tơtro ƀă tơdroăng nôkố.

A Sa Ly tơplôu ƀă tơbleăng