Tung rôh lăm pôu pêi cheăng, Khu râ kăn hiăng ai rôh trâm mâ, pêi cheăng ƀă Khu Kăn xiâm Kuô̆k hô̆i kong têa Brazil ƀă Việt Nam; Khu Tơrŭm nhŏng o Brazil ƀă Việt Nam; Đảng Kŏng san Brazil ƀă Đảng Lao động Brazil. Pêi cheăng ƀă Khu kăn xiâm Kuô̆k hô̆i râ má môi nhŏng o Brazil ƀă Việt Nam, péa pâ môi tuăn tối Việt Nam ƀă Brazil ai hên tơmeăm ki ai hlâu, ki tơ’lêi hlâu vâ tŏng gum dêi pó. Tơpui tơno ‘na tơrŭm cheăng kâ, péa pâ tối tơdroăng châ tơƀrê tá hâi tơxâng ƀă tơmeăm ki ai hlâu ƀă tơdroăng tơrŭm cheăng ton xŏn.

Pôa Lê Hồng Quang pơkâ thế Kuô̆k hô̆i Brazil, ki má lối cho Khu Kăn Kuô̆k hô̆i râ má môi nhŏng o Brazil ƀă Việt Nam, pơtối môi tuăn pêi kêi đeăng tiô luât, pro tơ’lêi hlâu ăm khu tê mơdró péa tơnêi têa mơ’no liăn cheăng, tê mơdró; mơdêk tơrŭm cheăng tung mâu kơvâ pêi chiâk deăng  xúa kŏng ngê̆ rơxông nếo, kơmăi kơmok uâ pro tơmeăm, on tơhrik ki vêh bro, pơhlêh xúa kŏng ngê̆, khoa hok – kŏng ngê̆, logistics ƀă hnê mơjiâng mơngế pêi cheăng.