Kơxê hâi lơ 10/11, a Hà Nội, pôa Trần Tuấn Anh, Kăn cheăng tung Khu xiâm kal kí, Kăn pơkuâ cheăng kâ Tơnêi têa, teăng mâ Khu xiâm Đảng pin, hiăng tơdah khu râ kăn xiâm Đảng kŏng san Peru.

Pôa Trần Tuấn Anh mơnhên Đảng Kŏng san Việt Nam đi đo nhuô̆m, pói vâ đi đo pro krá tơniăn ƀă mơdêk tơrŭm cheăng ƀă mâu kong têa, mâu đảng ai tơrŭm tiô khôi vâi krâ nah, tung mê ai Đảng Kŏng san Peru ing tơrŭm tơdroăng mơnhông tơtêk tơnêi têa, pơxúa tơdâng ƀă pơkâ tơrŭm tung rơxông nếo xua pơxúa dêi kuăn pơlê rêm tơnêi têa, xua hơniêp lĕm, tơrŭm ƀă mơnhông mơdêk kơpong ƀă lâp plâi tơnêi. Kăn pơkuâ hnê ngăn Đảng Kŏng san Peru Lu-ít Vi-gia-nu-ê-va tối rơdêi Đảng Kŏng san Peru đi đo nhuô̆m tơrŭm cheăng tiô khôi vâi krâ nah, rŭm môi tuăn ƀă Đảng Kŏng san Việt Nam; tơkêa pơtối veăng kum tung tơdroăng mơdêk tơrŭm nhŏng o ƀă tơrŭm lĕm tro pơla péa Đảng, péa Tơnêi têa ƀă kuăn pơlê péa tơnêi têa tung la ngiâ.