VOV4.Xơ Đăng – Hên kơvâ cheăng kâ dêi kong pơlê Dak Lak hiăng vêh pơxiâm mơnhông mơdêk klêi kơ’nâi môi pơla ton tro tơdjâk xua  pơrea\ng COVID-19. Mâu khu tê mơdró a kong pơlê dế mơ-eăm thăm mơnhông tê mơdró klêi kơ’nâi pơrea\ng rế hía rế châ mơdât. Hên tơdroăng ki nếo dế châ mơjiâng ăm hneăng tơtêk nếo dêi kong pơlê. {ai chêh dêi Nam Trang, Ngế chêh hlá tơbeăng cheăng tung Rơ’jíu Việt Nam kơpong Tây Nguyên ai chêh tối ‘na tơdroăng kố.

Tung kơpong klâ hên khu ƀă kơxuô tơmeăm dêi hngêi kơmăi mơjiâng pro ƀier Sài Gòn Dak Lak – Kŏng ti tơlo liăn cheăng ƀier Sài Gòn miên Trung, mâu kŏng nhân dế thâ pât kơmăi vâ djâ, pơto mâu tơmeăm hiăng kơxuô kêi đeăng, djâ troh hnôu ‘măn tơmeăm. Mâu rơxế pơtăng dêi pó prôk tung hngêi kơmăi ăm hlo mơjiâng tơmeăm khoăng a kố hiăng tơniăn klêi kơ’nâi 2 hơnăm tro tơdjâk xua pơreăng COVID-19. Ngoh Lại Thế Nguyên, kŏng nhân dêi hngêi kơmăi ƀier Sài Gòn Dak Lak tối ăm ‘nâi, sap ing klêi kơ’nâi Têt lo hơnăm nếo 2022, tâi tâng tơdroăng pêi cheăng dêi hngêi kơmăi hiăng tơniăn châ vâ chê 80% tơdroăng cheăng, kŏng nhân hiăng vêh pêi cheăng tiah hmâ ƀă tâi tâng kăn ƀô̆ kŏng nhân tung kŏng ti tơ’noăng pêi cheăng, mơ-eăm kêi đeăng pơkâ mơ’no dêi Kŏng ti.

‘’Nhŏng o kŏng nhân rơtế tâi tâng kăn ƀô̆ kŏng nhân viên dêi Kŏng ti khŏm mơ-eăm pêi pro tơtro hnoăng cheăng dêi Kŏng ti xiâm pơkâ mơ’no xuân môi tiah tơmeăm dêi kŏng ti. Mơ-eăm hơnăm kố kô kêi đeăng hnoăng cheăng ƀă châ tơmeăm lĕm tâ hơnăm nah’’.

Kŏng ti pêi cheăng tiô rơnó môi khu rơxế kân pơto tơmeăm An Phước, Dak Lak xuân hiăng  tơkâ hluâ troăng prôk pá puât má môi, ƀă pơto 107 rơpâu tâ̆n tơmeăm khoăng hiăng châ pơto tung 3 khế apoăng hơnăm.

Kŏng ti pêi cheăng tiô rơnó rơxế pơto tơmeăm An Phước dế pêi cheăng tâi ivá tơná dêi 130 toăng rơxế ki dế ai nôkố

Pôa Phạm Đông Thanh, Kăn pơkuâ Kŏng ti pêi cheăng tiô rơnó môi khu rơxế ôtô pơto tơmeăm An Phước, Dak Lak tối ăm ‘nâi: nôkố Kŏng ti hiăng châ 100% tơdroăng xúa pơto tơmeăm dêi khu rơxế. Rơtế ƀă mâu tơmeăm troh ing mâu tơmối ki mung pơto tơmeăm hiăng ton, Kŏng ti xuân hiăng châ tơdah hên tơmeăm ing mâu tơmối ki ai tơmeăm pơto ki ê. Pôa Thanh tối, châ tơƀrê kố cho xua khu pơkuâ Kŏng ti hiăng pêi pro tơtro tơdroăng ôh tá mơdêk yă pơto tơmeăm laga xuân tơniăn pêi lo liăn dêi Kŏng ti tung pơla yă têa châu têa kơxăng ƀă hên kơxô̆ liăn ki ê veăng tŏng kum a mê đi đo tâk hên:

‘’Ngin xuân pơkâ troăng pêi, ti tăng hên khu ki vâ pơto tơmeăm vâ krếo khu tê mơdró pơto tơmeăm tiah hmâ ôh tá pơtê. Pakĭng mê ngin xuân pơkâ mâu troăng pêi vâ kơdĭng têa châu têa kơxăng, ki rơhêng vâ tối ngin mơ-eăm tơrŭm pơto hên tơmeăm vâ ví tơdroăng rơxế kơtâu ôh tá ai pơto ki klâi. tơdroăng pêng tơmeăm khoăng kơtâu péa troăng kô mơ-eăm châ a kơlo hên má môi vâ ví tơdroăng lup kơxô̆ liăn rôe têa châu têa kơxăng’’.

Prôk tơkâ hluâ mâu khế pá puât má môi, tơdroăng rêh ối pơlê pơla a Dak Lak nôkố xuân pơxiâm vêh kơdrâm. Tơdroăng pơreăng xông tâ tú hiăng ôh tá pro xâu rơ-iô klâi xếo drêng tâi tâng hok tro pơrá hiăng troh hngêi trung, mâu hngêi pơkeăng pơtân hiăng kêi đeăng hnoăng cheăng ƀă chôa ‘lâng ƀă tơdroăng pêi cheăng dêi mâu hngêi trung.

Mâu roh ô kâ pakong châ tơkŭm po a mâu kơpong, tiú ôm hyô dế cho tơdroăng rah dêi mâu khu râ tơmối troh ƀă Dak Lak

Tung tơdroăng phiu ro mê, kơvâ ôm hyô tơdah tơ’nôm tơmeăm vâ vêh xông tơtêk. Jâ Nguyễn Thụy Phương Hiếu, Kăn phŏ pơkuâ ‘na mơhno túa lĕm tro tơ’noăng ivá ƀă Ôm hyô kong pơlê Dak Lak tối ăm ‘nâi, tơdroăng ki vêh xông tơtêk   dêi kơvâ ôm hyô Dak Lak châ tiô troăng tơbleăng, tơbleăng ôm hyô kong pơlê tiô troăng ƀeăn ƀĕng, châ tơƀrê tung rơ’jiú, um tơvi ƀă hyôh măng internet. Tiô tơdroăng tơdjêp, po rơdâ mâu troăng ôm hyô ƀă tiô mâu tơdroăng mơ-eăm mơdêk tơdroăng tê mơdró, pro nếo tơmeăm ôm hyô dêi rêm khu tê mơdró:

‘’Á pêi tơdroăng pơtâng tối tung 2 hơnăm pơla kố nah cho hên ƀă rơdêi xua mê mơni tơmối ôm hyô vâi hiăng hlo um méa dêi Dak Lak ƀă vâi mơnhên dêi um méa tơná vâ la lâi vâi ai liăn ngân mê vâi kô rah xo troh ƀă Dak Lak xua mê roh Têt ƀă roh leh tơbâ hnoăng pơtáu Hùng Vương mê tơmối troh kơdrâm ‘nâng ƀă nôkố xuân hiăng tơdroăng ki vêh hiăng tơniăn ‘na kơxô̆ tơmối ƀă mâu khu tê mơdró mê mơ-eăm hên tung tơdroăng ti tăng tơmối tơdjêp ƀă mâu kong pơlê. Vâ chôa ‘lâng tơtêk tơmối lâp plâi tơnêi troh ƀă Dak Lak mê pin tơrŭm rơdêi tâ ƀă Khánh Hòa, Đà Nẵng’’.

Vâ pêi pro pơkâ pro tơniăn cheăng kâ – rêh ối pơlê pơla hơnăm 2022 – 2023, pơla kố nah Viƀan kong pơlê Dak Lak hiăng tơbleăng Tơdroăng pro tơniăn ƀă mơnhông cheăng kâ – rêh ối pơlê pơla hơnăm 2022 – 2023, tung mê tơmiêt troh pơkâ pro tơniăn rĕng mâu tơdroăng pêt mơjiâng tơmeăm, tê mơdró tung kong pơlê, thăm mơnhông mâu tơdroăng tơtêk; kơjo mâu kơvâ ki kal, tơniăn pêi pro mâu pơkâ mơnhông mơdêk cheăng kâ – rêh ối pơlê pơla hiăng pơkâ mơ’no.

Tơmối châ xah mâu tơdroăng xah hêi a kơpong ôm hyô Kŏ Tam

Pôa Nguyễn Đình Trung, Kăn cheăng tung tíu xiâm Đảng, Kăn pơkuâ hnê ngăn cheăng Đảng kong pơlê Dak Lak tối ăm ‘nâi:

‘’Kong pơlê dế tơkŭm pơkâ pêi kong pơlê xuân môi tiah pơkâ xúa tơnêi, pơkâ pêi mâu kơpong mơnhông mơdêk. Tơniăn dâi lĕm, tơtro tơdroăng nôkố drêng khu mơ’no liăn cheăng troh ƀă kong pơlê mê vâi ai xiâm kối vâ hriăn plĕng ƀă vâi séa ngăn ƀă pơkâ mơ’no. Tơdroăng má péa nếo cho tơrŭm pơla mâu khu tung tơdroăng pêt mơjiâng tơmeăm kố xuân cho hnoăng dêi kong pơlê, kong pơlê xuân thế lo pêi pro tơdroăng tơdjêp pơla mâu khu cheăng tung tơdroăng pêt mơjiâng tơmeăm khoăng. Tơdroăng má pái mê cho tơdroăng tê tơmeăm khoăng xuân môi tiah hlối pêi ƀă tơdroăng kơmăi kơmok uâ mơdiê tơmeăm khoăng ƀă mâu tơdroăng hngêi trăng troăng klông. Tung tơdroăng cheăng xuân môi tiah hnoăng dêi kong pơlê, kong pơlê kô pro tơ’lêi hlâu má môi’’.

Roh leh tơbâ hâi tơleăng lĕm peăng hdroh tơnêi têa ƀă hâi Lâp plâi tơnêi pêi cheăng, Dak Lak xuân tơdah mâu tơdroăng ki phiu ro ‘na cheăng kâ, tơmối ôm hyô troh kơdrâm hâ tung mâu hngêi ăm tơmối kâ koi ối pơtê, mâu kơpong xah hêi, tíu ôm hyô. Mâu kơpong hngêi kơmăi kơmok a kong pơlê dế lôu péa tơdah mơngế pêi cheăng; tê tơmeăm khoăng ngi kong têa ê pơtối tơtêk rơdêi drêng mơjiâng lối 1 rơtal dolar hơnăm 2021. Mâu ngo pêng plâi treăng trí, plâi treăng kêt dro mot tung rơnó krí plâi ƀă pêi lo châ hên ƀă yă kơnâ, dế tăng pêi lo liăn kum kuăn pơlê pêi chiâk deăng hmiên tuăn pêt mơjiâng tơmeăm khoăng ƀă hía hé. Mâu tơdroăng ki ro mê dế po tơdroăng pói tơngah ăm tơdroăng pro tơniăn, mơnhông mơdêk cheăng kâ dêi Dak Lak./.

Nam Trang rah chêh

A Sa Ly tơplôu ƀă tơbleăng