Hneăng hôp tối, khu lêng kŏng an đi đo mơdêk hnoăng cheăng pêi “Pêi cheăng  xua vâ gum kuăn pơlê’’, hiăng ai hên hnoăng veăng ‘no pêi tơkâ luâ tơdroăng pá xua kong mêi têa lân lu, kum kuăn pơlê “tŏng kum kuăn mơngế cho hnoăng cheăng xiâm dêi mâu lêng kŏng an kuăn pơlê”.

Rôh khía kât má 3 plong mot ƀă kong mêi têa rơlêa klêi khía plong mot hiăng lŭp hên kế tơmeăm ƀă hlâ mơngế, ƀă mâu kuăn pơlê mâu kong pơlê kơpong peăng Kơnhŏng, malối a mâu kong pơlê Lào Cai, Yên Bái, Cao Bằng, Hà Giang... pro lŭp kân, ƀă lối 348 ngế hlâ, hía; vâ chê 2 rơpâu ngế tro rong; lối 230 toăng hngêi tơ’nhiê; tro lŭp dâng 32 rơpâu rơtal liăn.

Pơtối rak vế pêi pro tơdroăng “Hơ-ui gum dêi rơpó”, kŏng an mâu tíu pêi cheăng,  cheăm tơring, kong pơlê  hiăng tăng tŏng xo mâu ngế trâm xía vâ, veăng gum kuăn pơlê tơkâ luâ tơdroăng pá xúa khía rôh má 3 plong mot pro têa rơlêa lân lu klêi ai khía kân plong mot, pêi tơniăn tơdroăng cheăng ăm kuăn pơlê rêh ối.