VOV4.Xơ Đăng - Kơxo lơ 1/7, Khu ki séa ngăn kơxô̆ 4, Khu xiâm ngăn hnê hriâm ƀă hnê mơjiâng tuăn ngoâ rơkê, hiăng troh séa ngăn hnoăng cheăng hbrâ ăm rôh tơ’noăng râ má pái phôh thong hơnăm 2022 a kong pơlê Dak Nông. Rôh tơ’noăng ra má pái phôh thong hơnăm 2022, lâp kong pơlê Dak Nông ai 6.881 ngế hok tro chêh inâi tơ’noăng, tung mê, ai 6.593 ngế hok tro râ má pái phôh thong ƀă 288 ngế hok tro yăo dục thường xuyên. Kong pơlê xing xoăng 19 tíu tơ’noăng ƀă 303 to lâm tơ’noăng, tâk tơ’nôm 1 tíu tơ’noăng tâ vâ pơchông ƀă rôh tơ’noăng hơnăm nah.

Pôa Nguyễn Xuân Thanh - Ngế cheăng tung Khu xiâm ngăn 'na hnê hriâm tơpui 'na hneăng tơ'noăng a kong pơlê Dak Nông

Troh nôkố, tâi tâng mâu tíu tơ’noăng a kong pơlê Dak Nông hiăng hbrâ rơnáu túa pơkâ tơkŭm po rôh tơ’noăng tiô pơkâ dêi Khu xiâm pơkuâ ngăn hnê hriâm ƀă hnê mơjiâng tuăn ngoâ rơkê. Klêi kơ’nâi séa ngăn ki khât a mâu tíu tơ’noăng, Khu kăn séa ngăn dêi Khu xiâm ngăn hnê hriâm pơchân mâu tơdroăng ki mơni kô trâm môi tiah: Hok tro djâ phôn râng kŏng mot tung lâm tơ’noăng, kong pơlê kal hnê mơhno séa ngăn nhên mâu tơdroăng ki hbrâ rơnáu, hbrâ pơkâ pơxâu mâu tơdroăng ki trâm vâ rak tơniăn ăm rôh tơ’noăng.

Katarina Nga tơplôu ƀă tơbleăng