VOV4.Xơ Đăng - Hâi lơ 10/6, a pơlê kong kân Đà Nẵng, Khu xiâm ngăn hnê hriâm ƀă hnê mơjiâng tuăn ngoâ rơkê tơkŭm po tơbleăng hriâm klê têa tơniăn, hbrâ ví klâk têa ƀă pơxiâm po Rôh tơ’noăng Klê hok tro phôh thong lâp tơnêi têa hơnăm 2022. Rôh tơ’noăng kố po sap ing hâi lơ 8 – 13/6 ƀă tơdroăng veăng dêi 700 ngế hok tro a 26 to kong pơlê, pơlê kong kân tung lâp tơnêi têa. Maluâ tơdroăng ki klâk têa a tơnêi têa hlo chía kơdroh la rêm hơnăm xuân ối ai dâng 2 rơpâu ngế hlâ, hên má môi tung kơpong Đông Nam Á tâk 8 hdroh mau kong têa ki mơnhông tơtêk.

Hơnăm 2022, Khu xiâm ngăn hnê hriâm ƀă hnê mơjiâng tuăn ngoâ rơkê hiăng pơkâ thế pêi pro klêi mâu hlá mơ-éa hnê hriâm, hbrâ mơdât klâk tê, mâu hlá mơ-éa, video clip um tơvi, hnê ‘na tơdroăng ki hbrâ ví klâk têa ăm hok tro. Tơdrêng amê hlối tơkŭm po hnê klê têa, hnoăng cheăng hbrâ mơdât klâk têa, hnê klê têa, tŏng xo tơniăn drêng ai ngế klâk têa ăm 400 ngế kăn ƀô̆, thái cô xiâm dêi 63 to Khu ngăn hnê hriâm ƀă hnê mơjiâng tuăn ngoâ rơkê.

Katarina Nga tơplôu ƀă tơbleăng