A chôu phut leh mê, tiô tơdroăng pơcháu hnoăng dêi Ngế xiâm ngăn Kŏng an, Khu kăn pơkuâ ngăn tơdroăng rah ‘mot mơngế pro kăn ƀô̆ hiăng tối tơbleăng Hlá mơ-eá pơkâ dêi Ngế xiâm ngăn Kŏng an ‘na hơ’lêh tíu pêi cheăng, rah xo Đăi tă Nguyễn Thanh Liêm, pơlê xiâm Hà Tĩnh, Kăn phŏ ngăn Kŏng an kong pơlê Hà Tĩnh pôu râng tơdroăng cheăng ƀă hnối tơdah xo hnoăng Kăn ngăn Kŏng an kong pơlê Dak Nông.

Klêi tơdah xo hnoăng cheăng mê, Đăi tă Nguyễn Thanh Liêm tơhrâ kô thâ rĕng rak tơniăn hnoăng pơkuâ ngăn tơdroăng cheăng, tí tăng hlê plĕng nhên mâu tơdroăng ki ai tung rêm kơvâ cheăng, tung kong pơlê; pơtối mơdêk pôu râng hnoăng cheăng, pleăng dêi hên hnoăng cheăng, tuăn mơno ki rơkê tơná veăng tơdjuôm ivá cheăng, hiâm mơno rơtế ƀă khu râ Đảng ủy, Khu pơkuâ ngăn Kŏng an kong pơlê ƀă tâi tâng mâu kăn ƀô̆, mâu lêng pêi pro klêi hnoăng cheăng châ pơcháu, kring vế tơniăn tơdroăng rêh ối, tơdroăng pêi cheăng kâ, mơjiâng khu lêng Kŏng an Dak Nông krúa lĕm, krá tơniăn tung rêm kơvâ cheăng.