Tiô Vi ƀan kuăn pơlê dêi kong pơlê Dak Nông, tơdroăng cheăng, tăng xo, pro ƀă xúa meăm bauxite a kong pơlê châ tơbleăng 17 hơnăm kố la troh nôkố nếo bú pơtê a mơjiâng tơmeăm alumin, hâi teăm ai nhôm ƀă tơmeăm ki pro klêi nhôm. Tơdroăng ‘no liăn mơjiâng mâu tơmeăm khoăng, tơdroăng tơkêa bro xuân môi tiah troăng hơlâ séa ngăn, ‘no liăn cheăng pêi mâu tơdroăng tơkêa bro tung kong pơlê ối tơvâ hên xua tơdjâk troh pơkâ ‘na meăm bauxite.

Ngế pro xiâm hnê ngăn Chin phuh hnê mơhno ăm mâu khu xiâm, kơvâ cheăng ai tơdjâk troh tăng ‘nâi plĕng tah mâu tơdroăng xơpá la troh nôkố ki ối tơvâ mê, ôh tá tro mê hâi châ tơleăng. Tiô pôa Hồ Văn Mười, Kăn xiâm hnê ngăn Vi ƀan kuăn pơlê kong pơlê Dak Nông, bauxite kal thế châ séa ngăn cho môi túa meăm ki ai to a kong pơlê kố ƀă thế tơdroăng pêi pro gá ti lâi ăm tơtro.

Dak Nông kal tơkŭm tơrŭm dêi mâu kăn ƀô̆, khu râ, kơvâ cheăng vâ ‘mâi rơnêu Luât ‘na meăm tung kơdâm tơnêi a rôh hôp Kuô̆k hô̆i la ngiâ ah. Tối tơbleăng a rôh pêi cheăng, pôa Trương Thanh Hoài, Ngế xiâm phŏ ngăn Tê mơdró ăm ‘nâi, ƀă mâu tơdroăng xơpá, tơvâ tơvân kong pơlê pâ thế, Khu xiâm ngăn tê mơdró tơmâng xo ƀă kô tơrŭm ƀă mâu khu xiâm, kơvâ cheăng tăng ‘nâi plĕng tối ăm Chin phuh, Kuô̆k hô̆i, rĕng tah ki xơpá tơvâ tơvân vâ kong pơlê kô châ tơbleăng mâu tơdroăng cheăng kâ, rêh ối.