Peăng xêi hâi lơ 11/8, jâ Phạm Thị Tranh Trà, Ngế cheăng tung Tíu xiâm Đảng, Khu pơkuâ hnê ngăn kăn ƀô̆ ngăn ‘na kơvâ cheăng Đảng, Ngế xiâm ngăn ‘na cheăng kăn ƀô̆ rơtế ƀă khu pêi hnoăng cheăng hiăng ai roh lăm pôu, pêi cheăng ƀă Vi ƀan hnê ngăn kong pơlê Dak Lak ‘na rak vế pêi pro hnoăng cheăng dêi tơnêi têa ‘na kơvâ cheăng seá ngăn kăn ƀô̆ a kong pơlê Dak Lak sap ing hơnăm 2021 troh hâi lơ 30/6/2023.

A chôu phut pê cheăng mê, jâ Phạm Thị Thanh Trà, Ngế xiâm ngăn ‘na kơvâ séá ngăn cheăng kăn ƀô̆ hiăng tối nhên, tung pơla pêi pro tiô hnoăng pơcháu, Dak Lak ối ai hên tơdroăng pêi pro ki tá hâi teăm tơtro, xua tá hâi ai troăng hơlâ ki rơdêi vâ ‘mâi rơnêu, hơ’lêh mâu ngế bro kăn ƀô̆, lơ ‘no tah lôi mâu kăn ƀô̆ ki ‘ro, pêi tơdroăng cheăng ôh tá rơhéa, lơ ôh tá hâi ai tŭm ƀăng ki kố ki mê; xuân u ối khu kăn ƀô̆ ki pêi cheăng tá hâi tơtro tiô pơkâ ‘na kơvâ cheăng tơná; mâu kăn ƀô̆ ki cheăng a pơlê cheăm, tơring xuân ối ‘ro, thăm nếo, xuân ai mâu kăn ƀô̆ ki pêi cheăng bu to ai inâi tê ôh tá vâ pêi pro ki klâi, tí tăng ví lôi hnoăng cheăng, xâu pôu râng hnoăng cheăng hngăm; Kơvâ ki ‘mâi rơnêu túa hnoăng cheăng kăn ƀô̆ dêi kong pơlê pêi cheăng xuân tá hâi teăm tơniăn.

‘Na mâu troăng hơlâ ki vâ pêi pro tung la ngiâ, jâ Phạm Thị Thanh Trà pơkâ thế kong pơlê Dak Lak kal mơjiâng môi tơdroăng cheăng ki trâu rơdâ hơngế ki nhên, tơtro tâ, pơtối mơnhông tăng rah xo mơngế ki rơkê vâ to pro kăn ƀô̆, tung mê, kơjo kum tăng rah mơngế kuăn ngo to pro kăn ƀô̆, mơdêk hnoăng cheăng dêi tơnêi têa tung mâu kơvâ cheăng, maluâ kăn ƀô̆ ngăn ‘na kơvâ tơdroăng khôp ƀă ‘na kuăn ngo.