VOV4.Xơ Đăng - Kơxê măng lơ 1/7, pôa Nguyễn Chí Dũng, Ngế cheăng tung Khu pơkuâ ngăn Tíu xiâm Đảng, ngế xiâm ngăn tơdroăng pơkâ ƀă ‘no liăn cheăng, prếi pôa Nguyễn Hồng Diên, ngế cheăng tung tíu xiâm Đảng, ngế xiâm ngăn cheăng kơmăi kơmok ƀă tê mơdró, rơtế ƀă khu kăn ki pêi dêi hnoăng cheăng tung Tơnêi têa hiăng ai rôh pôu pêi cheăng a kong pơlê Dak Nông ‘na pêi pro Tơdroăng pơkâ ƀă Mơgêi dêi Khu xâm pơkuâ tơdroăng kal kí ‘na mơnhông mơdêk cheăng kâ rêh ối pơlê pơla, rak vế tơniăn hbrâ pơlê pơla cheăm bêng kơpong Tây Nguyên.

Pôa Nguyễn Chí Dũng, Ngế xiâm ngăn tơdroăng pơkâ ƀă ‘no liăn cheăng tơpui a rôh pôu pêi cheăng a kong pơlê Dak Nông 

Mơgêi rôh pêi cheăng, pôa Nguyễn Chí Dũng, ngế xiâm ngăn pơkâ ƀă ‘no liăn cheăng tơpui, Dak Nông hiăng pêi châ hên tơdroăng ki kal tâng vâ pơchông ƀă tơdroăng pơkâ mơ’no dêi tơdroăng pơkâ; khu pơkuâ tơdroăng kal kí, tơdroăng gâk kring tơniăn hiăng hlo tơniăn ƀă rak vế krá; tơdroăng rêh ối hiâm mơno, liăn ngân dêi kuăn pơlê, malối cho kơpong hdroâng kuăn ngo rế hía rế châ mơdêk, pôa Nguyễn Chí Dũng tối nhên, Dak Nông kal athế mơdêk rĕng tơdroăng ki kong pơlê pơla, séa ngăn tơdroăng pơkâ tơmiât mơnhông dêi Tơnêi têa ƀă mâu khu xiâm, kơvâ cheăng hiăng tơbleăng vâ rak vế tơniăn ƀă mơnhông tro troăng rĕng ăm Dak Nông mơnhông, krá tơniăn ton.

Katarina Nga tơplôu ƀă tơbleăng