VOV4.Xơ Đăng - Hâi lơ 30/6, Khu râ kăn séa ngăn dêi Khu xiâm pơkuâ hnê hriâm ƀă Hnê mơjiâng tuăn ngôa rơkê xua pôa Nguyễn Văn Phúc, Ngế xiâm phŏ pơkuâ xiâm khu râ kăn hiăng ai roh pêi cheăng ƀă Khu hnê mơhno tơ’noăng mơgêi râ má pái phôh thông hơnăm 2022 kong pơlê Dak Lak ‘na tơdroăng tơkŭm po Hneăng tơ’noăng. Klêi kơ’nâi séa ngăn, Khu râ kăn kheăn kơdeăn tơdroăng hbrâ ăm Hneăng tơ’noăng a kong pơlê Dak Lak, ing tơniăn tơmeăm khoăng troh tơdroăng hnê pơtâp ăm kăn ƀô̆ veăng Hneăng tơ’noăng, tơdroăng in pro đê tơ’noăng, pơto đê tơ’noăng troh tíu tơ’noăng ƀă tơniăn đê tơ’noăng tro tiô pơkâ.

Tâi tâng roh pêi cheăng

Khu râ kăn pêi cheăng pơkâ thế Khu pơkuâ Hnê hriâm – Hnê mơjiâng tuăn ngôa rơkê a Dak Lak tơrŭm krá tơniăn ƀă mâu tíu cheăng ki tơdjâk hbrâ nhên tŭm tơdroăng. Tung mê kal tơmâng hên tâ mê nếo tơdroăng hnê pơtâp ‘na pơkâ tơ’noăng xua hơnăm kố ai hên tơdroăng ki nếo. Hneăng tơ’noăng kố, Dak Lak ai lối 20.400 ngế hok tro kĭ tơ’noăng. Kong pơlê tơkŭm po 32 tíu tơ’noăng ki păng ‘nâng ƀă 869 kơbong tơ’noăng tung 15 tơring, pơlê krâm ƀă pơlê kong kơdrâm.

A Sa Ly tơplôu ƀă tơbleăng