Pơtối mê, sap ing hâi lơ 11/10, yă tê ‘ngré on tơhrik tơdâng cho 2.103 liăn/kWh (tá hâi riân liăn hnoăng mơhá ki kơnâ tơtêk), tâk 4,8% tâng pơchông ƀă yă hdrối mê. ‘Na ki xiâm, tơdroăng pơhlêh yă on tơhrik roh kố kô tơniăn mâu rơpŏng kơtiê, mâu rơpŏng ai hnoăng tơnêi têa tro tơdjâk a kơlo ôh tá bê hên. Tiô riân ngăn, lâp tơnêi têa ai 815.000 rơpŏng kơtiê ƀă mâu rơpŏng ai hnoăng tơnêi têa châ tŏng kum liăn on tơhrik tiô troăng hơlâ dêi Chin phuh.

Tung mê, rơpŏng kơtiê châ tŏng gum ƀă kơlo tơdâng kơxô̆ on tơhrik xúa 30kWh/rơpŏng/khế. Rơpŏng ai hnoăng tơnêi têa ai kơxô̆ on tơhrik xúa ôh tá hluâ 50 kWh/khế châ tŏng gum tơdâng kơxô̆ on tơhrik xúa 30kWh. Kố cho roh tâk yă on tơhrik má 3 sap ing khế 5 hơnăm 2023, vâ pơhlêh yă tê ‘ngré on tơhrik tiô pơkâ kơchơ mơdró tơtro ƀă kơxô̆ liăn mơjiâng pro tê mơdró.