VOV4.Xơ Đăng - Kơxê lơ 3/6, Khu xiâm pơkuâ Kŏng an tơkŭm po mơgêi hneăng hôp, mơnhên tơdroăng châ tơƀrê pêi pro mơjiâng kŏng an cheăm, pơlê krâm ki păng 'nâng. Xông tơpui mơgêi hneăng hôp, pôa Tô Lâm, Ngế xiâm pơkuâ kŏng an kheăn kơdeăn mâu tơdroăng châ tơƀrê ki khu kŏng an cheăm, pơlê krâm châ tơƀrê tung pơla kố nah. Tung mê, tơdroăng pơkuâ tơnêi têa ‘na gak kring, tơniăn pơlê pơla châ pêi pro tơtro tâ, tơniăn tro tiô pơkâ dêi luât.

Pôa Tô Lâm, Ngế xiâm pơkuâ kŏng an xông tơpui hnê mơhno hneăng hôp

Pôa Tô Lâm tối ăm ‘nâi, tung la ngiâ, Đảng ŭy Kŏng an Tơnêi têa kô tơbleăng Pơkâ ‘na pơtối thăm mơjiâng kŏng an cheăm, pơlê krâm ki păng 'nâng tung rơxông nếo vâ tơkŭm mơjiâng kŏng an cheăm, pơlê krâm ki păng 'nâng tâi tâng; xing xoăng hnoăng cheăng, xing xoăng khu cheăng ƀă tơmeăm khoăng, tơmeăm ki vâ pêi cheăng ƀă hía hé, ai ivá tơleăng mâu tơdroăng ‘na gâk kring, tơniăn sap apoăng ƀă a tíu cheăng; khŏm mơ-eăm mơjiâng kŏng an cheăm, pơlê krâm rơtế khu Kŏng an kuăn pơlê mâu râ krúa lĕm, ó rơdêi, ki păng 'nâng, ƀeăn ƀĕng, tiô rơxông nếo tơxâng tiô tơdroăng pơkâ, hnoăng cheăng tung rơxông nếo.

A Sa Ly tơplôu ƀă tơbleăng