Veăng Hneăng tơ’noăng mo sêi ƀă Hneăng hôp roh kố, ai vâ chê 2.500 ngế tơ’noăng cho mâu kăn ƀô̆, mâu lêng ối tung 20 tíu cheăng kŏng an a kơpong peăng Hdroh.

Xông tơpui pơxiâm po, Thiê̆u tươ̆ng Lê Hồng Hiệp, Kăn phŏ kơ koan xiâm pơkuâ tơdroăng cheăng Đảng ƀă tơdroăng cheăng kal kí, Khu xiâm kŏng an, Kăn phŏ Khu hnê mơhno Hneăng tơ’noăng mo sêi ƀă Hneăng tơ’noăng mơnhên, tơdroăng thăm pêi pro ƀă mơdêk ki dâi lĕm, châ tơƀrê tơdroăng pêi cheăng tơ’noăng ivá ƀă luât, cheăng lêng, voh tơchok tung kŏng an kuăn pơlê cho môi tung mâu hnoăng cheăng, troăng pêi ki kal, veăng gum mơjiâng khu kŏng an kuăn pơlê krúa lĕm, krá tơniăn ó rơdêi, chính quy, ƀeăn ƀĕng rơkê, tiô rơxông nếo, tơxâng pơkâ, hnoăng cheăng tung rơxông nếo.