VOV4.Xơ Đăng - Hâi lơ 11/7, pôa Lê Công Thành, Ngế xiâm phŏ pơkuâ loăng pơlái kong kế ƀă kong prâi hiăng lăm séa ngăn tơdroăng hbrâ ví kong prâi pro ôh tá tơniăn a kong pơlê Kon Tum. Tiô tơbleăng, apoăng hơnăm 2021 kong tô ó a kong pơlê hiăng pro tro lŭp lối 93 ha loăng plâi; kong mêi têa kân lân lu pro 3 ngế hlâ, 136 toăng hngêi ối tro tơdjâk ƀă lối 700 ha loăng plâi tro lŭp; hên troăng klông, rơchôa hno têa tro tơ’nhê, tro lŭp dâng 126 rơtal liăn.

Pôa Lê Công Thành, Ngế xiâm phŏ pêi cheăng ƀă Vi ƀan kong pơlê Kon Tum

Vâ hbrâ ví ƀă kơdroh kong prâi pro ôh tá tơniăn, a kong pơlê Kon Tum pơkâ 27 tơdroăng tơkêa bro kal mơ’no liăn tung hneăng hơnăm 2021 – 2025 ƀă tâi tâng kơxô̆ liăn vâ chê 900 rơtal liăn vâ xĕn, xing xoăng tơniăn tơdroăng rêh ối ăm lối 2.500 rơpŏng kuăn pơlê ƀă dâng 10 rơpâu pơ’leăng mâ mơngế. Xông tơpui a roh pêi cheăng, pôa Lê Công Thành pơkâ thế kong pơlê Kon Tum pơchân tối troh tơdroăng kong prâi pro ôh tá tơniăn mâu khế mơ’nui hơnăm, hbrâ tơdroăng ki vâ châ ‘nâi kong prâi pro ôh tá tơniăn ăm mâu khu ki tŏng kum mơngế hliăng tiâ; hbrâ phôn hrik hyôh a rơvâ plêng ăm mâu kơpong hmâ tro têa kân lân lu pá vâ prôk lăm a dêi rơpó.

A Sa Ly tơplôu ƀă tơbleăng