VOV4.Xơ Đăng - Khu râ kăn Hnê ngăn Vi ƀan xiâm Măt trâ̆n Tơnêi têa Việt Nam nếo ai Tơbleăng ‘na tơdroăng séa ngăn dêi Măt trâ̆n Tơnêi têa Việt Nam sap ing klêi kơ’nâi hneăng hôp má péa troh hneăng hôp má pái, Kuô̆k hô̆i hneăng má XV. Rơtế ƀă tơdroăng pêi kêi đeăng Pơkâ séa ngăn plâ hơnăm 2021, Khu râ kăn hiăng pêi pro 10 tơdroăng xiâm séa ngăn tiô Pơkâ séa ngăn ƀă pro mơnhông mơdêk pơlê pơla hơnăm 2022.

Mâu tơdroăng séa ngăn pơrá châ mâu tơdroăng ki tơƀrê apoăng, kum pơ’lêh, pro hía mâu tơdroăng ki ôh tá lĕm, tơdroăng ki ối tơvâ ƀă mơnhông mơdêk, kheăn kơdeăn mâu tơdroăng châ tơƀrê tung mâu kơvâ cheăng ki phá tơ-ê dêi pó.

Hơnăm 2022, Mât trâ̆n Tơnêi têa Việt Nam pơkuâ séa ngăn mâu tơdroăng xiâm ki kal môi tiah: tơdroăng hriâm pât hiâm mơno dêi mơngế ối a ko, kăn ƀô̆ xiâm, kăn ƀô̆ đảng viên; tơdroăng pêi pro troăng hơlâ tŏng kum mơngế pêi cheăng ƀă mơngế xúa mơngế pêi cheăng trâm pá xua pơreăng kân COVID-19; tơdroăng tơleăng mâu roh tơdroăng săm tối, săm tơkêng tơdroăng ki pá, ton xŏn; tơdroăng pêi pro ki vâ pêi troh tơnêi têa mơnhông mơdêk cheăng kâ – rêh ối pơlê pơla kơpong hdroâng kuăn ngo ƀă kong ngo.

A Sa Ly tơplôu bă tơbleăng