Tối tơbleăng a rôh trâm mâ, Đăi tươ̆ng Phan Văn Giang, Ngế xiâm pơkuâ ngăn lêng tơkăng kong Việt Nam tối, kố cho môi hneăng hôp ki kal ai pơxúa khât, veăng chêh pơtối tung hlá mơ-éa ki nếo  tơdroăng tơrŭm tơrôa tiah hmâ, tơrŭm môi tuăn dêi rơpó ƀă tơrŭm tung tŭm tơdroăng cheăng pơla pái tơnêi têa. 

Đăi tươ̆ng Chansamone Chanyalath, Ngế xiâm phŏ hnê ngăn Chin phuh,  Ngế xiâm pơkuâ ngăn lêng tơkăng kong dêi Lếo tối: Mâu lêng pái tơnêi têa thế cho mâu lêng ki xiâm rơdêi tung tơdroăng mơjiâng kring gak, rak tơniăn, mơnhông tơrŭm cheăng, môi tuăn dêi rơpó cho tơdroăng ki kơnía git dêi pái tơnêi têa.

Đăi tươ̆ng Tea Seiha,  Ngế xiâm phŏ hnê ngăn tơnêi têa, Ngế xiâm  pơkuâ ngăn lêng gak tơkăng kong dêi Kul tối nhên: Tơdroăng trâm mâ tơpui tơno tơrŭm cheăng Lêng kring gak tơkăng kong rôh má môi pái tơnêi têa Kul - Lếo - Việt Nam cho rôh ki tơ’lêi hlâu vâ rêm pâ rơtế tối mâu tơdroăng cheăng pêi, tơdroăng cheăng pêi ki hiăng chiâng pêi pro châ tơƀrê ƀă tối nếo tơdroăng tơkêa krá tơniăn tung mơdêk tơrŭm tiô hmâ ton nah, tơnêi têa ki achê dêi rơpó tơrŭm tơniăn lĕm pro pơxúa tơdjuôm ăm tơnêi têa ƀă kuăn pơlê.