Pôa Nguyễn Văn Thắng, Ngế xiâm pơkuâ troăng prôk ƀă rơxế kơtâu  hiăng ai tơpui tối ƀă hlá mơ-éa ‘na xiâm kối, ki ối pá puât xuân môi tiah tơkêa rơtế kong pơlê Gia Lai tah lôi mâu tơdroăng pá puât, tơvâ tơvân ăm tơdroăng tơkêa bro rơnêu ăm i lĕm troăng kân tơnêi têa 19.

Troăng kân thăm tơdjêp troăng klông kơpong Tây Nguyên (rơnêu pro kân lĕm troăng kân tơnêi têa 19) xua Khu pơkuâ Tơdroăng tơkêa bro 2, Khu xiâm pơkuâ troăng klông ƀă rơxế kơtâu khu ki pơkuâ mơ’no liăn pro, ai tâi tâng kơxô̆ liăn mơ’no lối 3.600 rơtal liăn. Pơxiâm po hơnăm 2021 ƀă tiô pơkâ kêi đeăng a khế 6/2023. Laga ing mâu tơdroăng ối tơvâ tơvân pá puât tung pêi pro, khế 7/2023, Khu râ kăn teăng mâ Kuô̆k hô̆i kong pơlê Gia Lai hiăng ai hlá mơ-éa chêh xo rơkong tơpui dêi kuăn pơlê, pơtroh mâu kơ koan Tơnêi têa.

Tung mê tối ‘’Tơdroăng tơkêa bro rơnêu, po rơdâ troăng kân tơnêi têa 19’’ kơpong tơkâ hluâ tơring ‘Mang Yang ƀă cheăm Bình Giáo tơring Chư Prông, kong pơlê Gia Lai, tung pơla mơjiâng pro ton xŏn, tơdjâk troh tơdroăng rêh ối dêi kuăn pơlê, pá puât ăm kuăn pơlê prôk troăng.

Pơkâ thế dêi Khu xiâm pơkuâ troăng prôk ƀă rơxế kơtâu tơmâng, hnê mơhno Khu pơkuâ tơdroăng tơkêa bro 2 ƀă mâu tíu cheăng ki tơdjâk séa ngăn ƀă tah lôi mâu tơdroăng pá puât tung tơdroăng mơjiâng pro troăng kân.