Việt Nam ƀă Czëch tơrŭm tơpui kâ châ lối 70 hơnăm. Tơdroăng tơrŭm pơla péa tơnêi têa rế mơnhông rơdêi tung tŭm tơdroăng. Nôkố, mơngế Việt Nam a ối a kong têa Czëch châ mơnhên cho hdroâng kuăn ngo má 14 dêi Czëch. Vâ ai tiô tơdroăng pơkâ ki nếo, tơdroăng kĭ Tơhrâ krê ‘na kơjo kum luât tơleăng pơxâu phâk mơngế ai xôi pơ’lêh a mâu pơkâ ‘na kơjo kum luât tơleăng pơxâu phâk mơngế ai xôi tung tơdroăng kĭ Tơhrâ  hơnăm 1982 nah cho kal khât, veăng pê klêi tơdroăng chêh ‘na luât ‘na tơdroăng kơjo kum luât pơla péa tơnêi têa.

Tơdroăng kĭ Tơhrâ tơtro ƀă troăng rơhlâ tơpui kâ ki hbrâ rơnáu hdrối, mơ-eăm tung tơrŭm tơrôa lâp plâi tơnêi tung tŭm tơdroăng ƀă trâu rơdâ dêi Đảng ƀă Tơnêi têa pin  cho kong têa tung khu ki ai hnoăng cheăng pêi tung mâu kong têa lâp plâi tơnêi, cho ki ăm hlo nhên ki pơ’lêh mâu tơdroăng tơhrâ lâp plâi tơnêi dêi Việt Nam tung tơdroăng ‘na luât tơleăng pơxâu phâk mâu ki ai xôi, tơrŭm cheăng hbrâ mơdât mâu ngế ai xôi.