Cho môi tung mâu ngế ki djâ troăng ahdrối tung tơdroăng păn chêm pơlêng a Dak Lak, pôa Bùi Văn Thức, pơlê kân Phước An, tơring Krông Pač, kong pơlê Dak Lak hiăng phiu ro drêng hiăng ai hlá mơ-éa pơkâ ‘na tơdroăng pơkâ thé séa ngăn, mơnhên ƀă khăm mơnhên chêm pơlêng ki mơ’no tê ing Việt Nam troh a kong têa Sinuâ, drêng hlá mơ-éa kố hiăng châ xêt khât. Tiô pôa tối, maluâ a kơchơ tung tơnêi têa chía tơniăn, la tơdroăng ki mơ’no tê chêm pơlêng troh a kong têa ê ki păng ‘nâng troh a kong têa Sinuâ hiăng po roh ki tơ’lêi hlâu ‘na tơdroăng tê mơdró tung lâp plâi tơnêi, yă kô chía tâk kơnâ iâ, châ pêi lo liăn ngân chía hên há.

‘’Dak Lak cho kong pơlê ki ai tơ’lêi tung tơdroăng pêi lo kế tơmeăm tơtro khât vâ mơnhông kơpong păn chêm pơlêng, ki dâi lĕm ăm tơdroăng ki păn roăng, rak ngăn chêm. Tung plâ 10 hơnăm vêh ngi kố, tơdroăng păn chêm pơlêng hiăng chiâng tơdroăng cheăng ki păng ‘nâng, hên ngế hiăng pêi lo liăn ngân ing tơdroăng păn chêm pơlêng, xua mê, maluâ châ tê mơ’no tơ’lêi la tơdroăng yă xuân chía to kơnâ, pêi lo liăn tơniăn tâ’’.

Mâu khu mơdró ki pêi mơjiâng ƀă mơ’no tê chêm pơlêng a kong pơlê Dak Lak xuân hiăng pêi pro tơtro mâu tơdroăng ki pơkâ thế dêi ing mâu kong têa ki rôe. Jâ Phạm Thị Phương Dung, môi ngế ki mơdró a tơring Krông Pač tối ăm ‘nâi: Drêng tâng tối chêm pơlêng dêi Việt Nam châ tê mơ’no păng ‘nâng troh a kong têa Sinuâ, Kŏng ti hiăng pơxiâm chêh bro hồ sơ, po rơdâ mâu hngêi pêi cheăng, mâu plông, tơrŭm ƀă khu ki păn roăng chêm pơlêng vâ khoh ai chêm tê a kơchơ. Troh nôkố, chêm pơlêng Thành Dung cho môi tung 4 khu mơdró kâ dêi Việt Nam châ mơ’no tê păng ‘nâng troh a kong têa Sinuâ.

‘’Ngin hiăng pêi pro klêi tâi tâng mâu hlá mơ-éa ki vâ mơ’no tê chêm pơlêng troh a kong têa Sinuâ. Tung pơla mê hía ah, ngin pói rơhêng vâ tâi tâng khu mơdró kâ kô châ mơ’no tê, tơrŭm dêi pó pro ti lâi vâ inâi chêm pơlêng Việt Nam, rơtế dêi pó pêi pro troh a la ngiâ ah, vâ tơmeăm ki mơjiâng ing chêm pơlêng đêi Việt Nam châ tơniăn tâ’’.

Tiô pôa Phạm Văn Hậu, Kăn hnê ngăn khu păn chêm pơlêng Dak Lak tối, tơdroăng ki vâ păn roăng chêm pơlêng a kong pơlê kố cho kân ‘nâng. Ki dâi lĕm dêi tơdroăng păn chêm pơlêng a Dak Lak châ mơnhên tối krúa tơniăn lĕm tâng vâ pơchông ngăn chêm pơlêng ki păn a chuăn têa kơxĭ. Vâ khoh châ tơniăn ăm tơdroăng mơ’no tê chêm pơlêng, Khu ngăn ‘na păn chêm pơlêng Dak Lak kô pơtối tŏng kum mâu ngế xuân môi tiah mâu khu ki pơkuâ tơdroăng păn roăng thăm mơdêk tuăn mơno rơkê, xúa khoa hok kŏng ngê̆ vâ tơdroăng păn chêm pơlêng krúa tơniăn, dâi khât. Tơdrêng amê, khu kố kô tơrŭm ƀă mâu tíu ki păn chêm pơlêng ƀă khu mơdró kâ vâ rơtế dêi pó veăng pêi tơrŭm ƀă thăm mơdêk ki kơnía dêi kế tơmeăm păn. Pôa Phạm Văn Hậu tối:

‘’Khu ngin hiăng mơhnhôk vâi krâ mơnhông pêi tiô tơdroăng ki tơniăn. La ngiâ kố ah, khu ngin kô tơkŭm po roh hop tơrŭm ƀă tơdroăng ki vâ mơno tê, krếo thế mâu khu mơdró vâ hnê tối ăm vâi krâ nhŏng o tiô túa ki păn roăng chêm pơlêng, xuân môi tiah luât ki pêi pro tiô tơdroăng cheăng, Châ pơkuâ ngăn nhên mê tơdroăng ki mơ’no tê xuân châ rak ngăn tơniăn kơ chêm pơlêng’’.

Lâp kong pơlê Dak Lak dế nôkố ai lối 1 rơpâu rơpŏng păn chêm pơlêng, ai dâng 1 rơpâu 300 tíu ki păn chêm pơlêng tơkŭm hên a pơlê kong kơdrâm Ƀuôn Ma Thuột ƀă mâu tơring Ea Kar, Ea Súp, Krông Pač ƀă hên mâu tơring ki ê. Dak Lak cho kong pơlê ki ối má môi a Tây Nguyên, ƀă xuân cho tung 10 kong pơlê ki păn chêm pơlêng hên má môi tung lâp tơnêi têa. Tâng vâ riân ngăn khu chêm pơlêng ki kong pơlê kố păn châ  ing 10 troh 12 tâ̆n rêm hơnăm, châ dâng 6,6% khu chêm dêi lâp tơnêi têa. Riân troh chôu phut kố, Dak Lak hiăng hbrâ tŭm tâi tâng mâu tơmeăm khoăng, tơkôm mâu kơ koan ki ai tơdjâk troh séa mơnhên ngăn, mơnhên tối vâ khoh châ mơ’no tê chêm pơlêng dêi Dak Lak troh a kơchơ tiô kơ tơdroăng ki păng ‘nâng.

Tơdrêng amê, Hô̆i đong hnê ngăn kong pơlê Dak Lak hiăng pơkâ mơ’no Tơdroăng pơkâ tung kơpong ôh tá chiâng phep păn, kơpong ki chiâng phep păn chêm pơlêng, ai troăng hơlâ tŏng kum vâ hơ’lêh tíu ki păn lo ing kơpong ki ôh tá chiâng phep păn lo ing kong pơlê Dak Lak. Tơdroăng pơkâ mê cho vâ ‘mâi rơnêu tơdroăng ki kuăn pơlê mơ’no liăn mơjiâng pro kơdroăng păn chêm lối hên tung pơlê cheăm ƀă xúa kơmăi ki chuât pơ’lok vâ krếo chêm tơkŭm, pro tơdjâk troh tơdroăng rêh kâ ối dêi kuăn pơlê. Tơdrêng amê, pói rơhêng vâ rêm râ, rêm kơvâ cheăng, mâu tơring, cheăm tung kong pơlê pơkâ pêi pro tơtro tiô troăng hơlâ kố vâ vêh mơnhông tơdroăng păn roăng tối tơdjuôm, păn chêm pơlêng tối krê, ôh tá ăm ai tơdroăng ki mơjiâng kơdroăng chêm pơlêng tung pơlê cheăm ah lơ pro tơdjâk troh tơdroăng rêh kâ ối dêi kuăn pơlê môi tiah mâu tơdroăng ki hiăng hmâ trâm ho hdrối mê hía nah.