VOV4.Xơ Đăng -  Khu xiâm ngăn ‘na tê mơdró kong pơlê Kon Tum ăm ‘nâi, tung rôh khía mơhot kân kơxô̆ 9 hơnăm 2020, Kŏng ti veăng tơlo liăn pro hngêi kơmăi on tơhrik Đức Nhân, Đăk Psi ƀă Kŏng ti veăng tơlo liăn Đức Thành Gia Lai hiăng pêi pro rơchôa ôh tá tro pơkâ, têa chiâng lân lu pro lŭp hên tơmeăm khoăng báu prá alâi, loăngplâi dêi 62 rơpŏng kuăn pơlê a cheăm Đăk Long ƀă Đăk Psi, tơring Đăk Hà.

Troh nôkố vâ chê 2 hơnăm hiăng luâ, la 62 rơpŏng kuăn pơlê ki ai tơmeăm khoăng tro lŭp mê xuân hâi châ xo liăn ki chêl thiăn, liăn ki veăng kơjo kum vâi xua tro lŭp. Ki xiâm cho xua Kŏng ti veăng tơlo liăn Đức Thành Gia Lai mơnĕn xua kong prâi ôh tá tơniăn ƀă tơdroăng xúa têa dêi hngêi kơmăi on tơhrik râ kơpêng mê ki xôi ôh tá vâ ngăn krâ tung pơkuâ ngăn lo têa, oh tá tơrŭm séa ngăn, tí tăng ngăn, riân ki tro lŭp vâ pêi pro tơdroăng chêl thiăn liăn ăm kuăn pơlê, kơjo kum kuăn pơlê.

Kuăn pơlê tơtrâ hôu tối têa lu xua hngêi kơmăi on tơhrik lôi ăm têa tâk đik

Khu xiâm ngăn tê mơdró kong pơlê Kon Tum kô veăng tí tăng ‘nâi plĕng ăm Vi ƀan kong pơlê pâ thế Khu xiâm dêi Kŏng ti on tơhriik kơpong tơdế tơnêi têa pơtê mơ’no on tơhrik a hngêi kơmăi tâng ngế xiâm pơkuâ ngăn hngêi kơmăi mê pơtối oh tá vâ tơmâng chêl thiăn liăn ăm 62 rơpŏng kuăn pơlê ki tro lŭp. 

Gương tơplôu ƀă tơbleăng