VOV4.Xơ Đăng - Kơxê lơ 2/6, a tơring Đăk Hà, Khu pơkuâ Đoân Droh rơtăm Kon Tum tơkŭm po Leh lo lăm pêi tơdroăng Droh rơtăm pleăng hnoăng cheăng rơnó pơtê hriâm hơnăm 2022. Tơdroăng pêi kố ai mâu tơdroăng môi tiah: Đoân viên, droh rơtăm veăng mơjiâng thôn pơlê nếo, rak vế kong prâi, hbrâ ví ƀă kong prâi pro ôh tá tơniăn; Rak ngăn ăm vâi hdrêng, veăng tŏng kum kuăn pơlê tro tơdjâk xua pơreăng COVID-19; Pơtâng tối Luât droh rơtăm; tơkŭm ‘mot đoân viên, hô̆i viên nếo…

A Leh lo lăm pêi cheăng, Khu pơkuâ Đoân Droh rơtăm kong pơlê Kon Tum diâp 50 kơxuô tơmeăm ăm mâu vâi o hok tro pá puât mơ-eăm hriâm rơkê; Diâp Kơtong kum rêh ối pơlê pơla ăm 10 rơpŏng droh rơtăm hdroâng kuăn ngo, kuăn khôp pá puât; Diâp troăng pêi hbrâ mơdât xok chhá mơ’no pa kong, tôm gô̆m mâu xok tung kơpong thôn pơlê ƀă troăng pêi kơdrum loăng plâi tung cheăng kâ, hbrâ ví kong prâi pro ôh tá tơniăn; Diâp 1 rơpâu kơ’lo têa tôu ro ăm vâi hdrêng ai tơdroăng rêh ối pá puât; Kheăn kơdeăn 9 khu pú hên ƀă 9 ngế krê kơhnâ rơkê tung pêi pro mâu tơdroăng Khế Droh rơtăm hơnăm 2022.

Kon Tum lo lăm pêi tơdroăng Droh rơtăm pleăng hnoăng cheăng rơnó pơtê hriâm hơnăm 2022

Kơxo lơ 2/6, a pơlê kongkơdrâm Plei Ku, Khu pơkuâ ngăn Đoân Droh rơtăm kong pơlê Gia Lai tơkŭm po “leh lăm pêi cheăng dêi khu droh rơtăm pleăng hnoăng cheăng tơná pêi cheăng a rơnó pơtê hriâm hơnăm 2022’’ veăng lăm pêi cheăng ai 350 ngế đoân viên droh rơtăm. Rôh lăm pêi cheăng hơnăm kố, khu pơkuâ ngăn Đoân Droh rơtăm kong pơlê Gia Lai hiăng mơjiâng 5 khu droh rơtăm ki pleăng hnoăng tơná, lăm pêi cheăng plâ tung 3 khế rơnó pơtê hriâm.

Mâu tơdroăng cheăng pêi, tơmeăm khoăng pêi, tơdroăng pêi dêi khu pú hên tơkŭm pêi a mâu cheăm tíu tơkăng kong ƀă a mâu cheăm, pơlê ki dế mơ-eăm vâ châ mơnhên tối thôn pơlê nếo tung hơnăm 2022. Rôh lăm pêi cheăng drêng kố, khu hơnăm ối nếo Gia Lai mơ-eăm ‘mâi rơnêu, pro nếo 15km troăng tung thôn, pơlê; pêt nếo 150 rơpâu xiâm loăng ngiât; pro 3 toăng hngêi tuăn pâ, khăm pơlât, hnê tối ôu kâ trếo kơhiâm, rak vế ivá, pêi krúa kế kâ ki iâ gá 1.000 ngế kuăn pơlê; mơjâng pro nếo ƀă  pro 8 to hngêi lăm dế  a hngêi trung; hriâm tơdroăng pơxiâm pêi cheăm ăm mâu droh rơtăm.

A Sa Ly tơplôu ƀă tơbleăng