VOV4.Xơ Đăng - Leh tơbâ 50 hơnăm Ƀlêi trâng Đăk Tô – Tân Cảnh, hâi lơ 24/4, Khu xiâm pơkuâ lêng kô pơkuâ, tơrŭm ƀă tĭnh Ủy Kon Tum tơkŭm po Hneăng hôp tơpui tơno dó inâi: ‘’Ƀlêi trâng Đăk Tô – Tân Cảnh’’. Hneăng hôp vâ mơnhên ki kơnâ ki kal dêi ƀlêi trâng Đăk Tô – Tân Cảnh ƀă Ƀlêi trâng peăng kơnhŏng Tây Nguyên ƀă troăng mơnhông mơdêk dêi roh tơplâ xâ Mih, tong kum tơnêi têa a tíu tơplâ Tây Nguyên. Mơnhên troăng ki prôk nếo ‘na tơdroăng ki rơkê tơkŭm po, hnê mơhno ƀă pêi pro tơdroăng cheăng, kum ƀlêu trâng dêi roh tơplâ ƀâ ton xŏn hơnăm 1972.

Hneăng hôp tơpui tơno xo vế mâu tơdroăng ki rơkê mơnhông tơtêk ƀă túa ki rơkê ki kơnía tung pơkuâ, hnê mơhno dêi Khu xiâm Đảng, Quân ŭy Tơnêi têa, Khu xiâm pơkuâ lêng ‘na troăng tơmiêt pêi ton xŏn la ngiâ, nghê̆ thuât tơkŭm po, pêi pro tơdroăng tơplâ, troăng tơplâ môi tuăn dêi ƀinh chŭng; tơdroăng tơrŭm pơla mô đô̆i ƀă khu lêng kuăn pơlê ƀă kuăn pơlê Kon Tum, kơpong Tây Nguyên. Ing mê, mơhnhôk, mơnhông tung tơdroăng mơjiâng ƀă gâk kring Tơnêi têa.

A Sa Ly tơplôu ƀă tơbleăng