Mơnhên ‘na tơdroăng pêi pro hnoăng cheăng kâ – rêh ối pơlê pơla dêi Khu pơkuâ hnê ngăn cheăng Đảng kong pơlê Kon Tum ăm hlo hơnăm 2023 hên pơkâ ki kal ôh tá châ tiô pơkâ. Ki nhên kơlo tơtêk pơkâ cho lối 10% laga bu châ 7,32%; xo hnoăng liăn ngân Tơnêi têa pơkâ 4.500 rơtal liăn laga tơkêa pêi pro châ 4.200 rơtal liăn; mơ’no liăn ngân tơnêi têa bu châ 44% tâng pơchông kơxô̆ liăn ai khât dêi kong pơlê pơcháu ƀă rơtế amê cho hên pá puât, ối tơvâ tơvân.

A hneăng hôp má 14, Khu pơkuâ hnê ngăn Đảng ƀô̆ kong pơlê Kon Tum hneăng má XVI hiăng tơkŭm tơpui tơno, mơnhên xiâm kối, hnoăng cheăng dêi rêm kơvâ cheăng, kong pơlê ƀă mâu tơdroăng ki tá hâi pêi pro, tơdrêng amê pơkâ pơkâ pêi ƀă troăng tah lôi pá puât tung hơnăm 2024.