VOV4.Xơ Đăng - Tung péa hâi lơ 24 ƀă 25/4, Khu ki pêi dêi hnoăng cheăng dêi Vi ƀan hdroâng kuăn ngo xua pôa Hàu A Lềnh, Ngế cheăng tung Tíu xiâm Đảng, ngế xiâm pơkuâ, kăn hnê ngăn Vi ƀan hdroâng kuăn ngo pro kăn pơkuâ khu kăn kố hiăng pêi cheăng ƀă kong pơlê Kon Tum ‘na klêi kơ’nâi pêi pro hnoăng cheăng hdroâng kuăn ngo; Tơdroăng tơbleăng pêi pro pơkâ tơnêi têa mơnhông mơdêk cheăng kâ rêh ối pơlê kơpong hdroâng kuăn ngo ƀă peăng kong ngo, hneăng má I sap ing hơnăm 2021 – 2025 a kong pơlê Kon Tum.

Pôa Hầu A Lềnh, ngế xiâm ngăn hdroâng kuăn ngo tơpui a rôh pêi cheăng

Kong pơlê Kon Tum ai pơ’leăng mâ mơngế lối 568 rơpâu ngế ƀă 43 hdroâng kuăn ngo; hdroâng kuăn ngo châ lối 54,9%. Maluâ rêm hơnăm kong pơlê kơdroh sap ing 3 troh 4% rơpŏng kơtiê, la troh mơ’nui hơnăm 2021 kong pơlê xuân ối vâ chê 22 rơpâu rơpŏng kơtiê, châ vâ chê 16% tâng pơchông ƀă tâi tâng kơxô̆ rơpŏng kuăn pơlê tung lâp kong pơlê, tung mê rơpŏng hdroâng kuăn ngo ối tung rơpŏng kơtiê châ lối 94%.

Tâ tá rôh pêi cheăng

Tơpui a rôh pêi cheăng, pôa Hầu A Lềnh pơchân, tung pêi pro tơdroăng tơnêi têa mơnhông mơdêk cheăng kâ rêh ối pơlê pơla kơpong hdroâng kuăn ngo ƀă peăng kong ngo, kong pơlê Kon Tum kal hbrâ rơnáu mâu túa pơkâ tơbleăng pêi pro. Tơdrêng ƀă tơdroăng tơbleăng túa pơkâ tơ’nôm liăn ăm hơnăm 2023. Ngế xiâm ngăn hdroâng kuăn ngo xuân pâ thế kong pơlê Kon Tum tơmâng ngăn, ‘mot tơ’nôm mâu kăn ƀô̆ pêi cheăng ‘na hdroâng kuăn ngo iâ hlái châ tiô pơkâ.

Katarina Nga tơplôu ƀă tơbleăng