VOV4.Xơ Đăng - Tung 2 hâi hiăng hluâ, tơdroăng pôa Chu Ngọc Anh, Kăn hnê ngăn Vi ƀan pơlê kong kân Hà Nội ƀă pôa Nguyễn Thanh Long, Ngế xiâm ngăn ‘na pơkeăng ƀă khăm pơlât mơ’no lo ing Đảng, ăm pơtê cheăng; tro săm tối, rup kroăng cho tơdroăng châ kăn ƀô̆, đảng viên ƀă kuăn pơlê kong pơlê Kon Tum rơhêng vâ ‘nâi plĕng.

Pôa Trương Duy Cảnh, 69 hơnăm, 40 hơnăm cheăng Đảng ối a hngêi kơxô̆ 104, troăng Phạm Văn Đồng, bêng Lê Lợi, pơlê kong kơdrâm Kon Tum tối, tơdroăng hbrâ mơdât kâ kơhveăm liăn ngân cho hnoăng cheăng, cho tơdroăng cheăng đi đo dêi Đảng. Laga tá hâi la lâi hlo tơdroăng kố châ pêi pro kơtăng, thâ ƀă kơtăng môi tiah nôkố.

Pôa Trương Duy Cảnh

Ing tơdroăng dêi pôa Chu Ngọc Anh ƀă Nguyễn Thanh Long, pôa thăm loi tơngah tung tơdroăng tơplâ mơdât kâ kơhveăm liăn ngân dêi Đảng tối tơchoâm, tơdroăng pơkâ dêi pôa Nguyễn Phú Trọng, Kăn xiâm pơkuâ hnê ngăn Đảng hiăng hnê pơchân:

‘’Á loi tơngah păng ‘nâng Đảng pin pêi pro kơtăng ƀă mơngế pro pơxúa hnoăng kâ kơhveăm tơmeăm kuăn pơlê, kâ kơhveăm tơmeăm tơnêi têa, hiâm mơno ôh tá lĕm tơdrăng. Pơla kố nah, pôa Nguyễn Thanh Long, Ngế xiâm ngăn ‘na pơkeăng ƀă khăm pơlât ƀă pôa Chu Ngọc Anh, to mâu kăn ki kân tê, laga ôh tá xê hlo dêi tơná kăn mê vâ pro ti lâi xuân hôm. Tiô á pin tơdjuôm ivá mơjiâng ƀă rơtế tơdjuôm ivá vâ tơplâ mơdât kâ kơhveăm liăn ngân, hbrâ mơdât hiâm mơno ôh tá lĕm ƀă kăn ƀô̆, đảng viên’’.

A Sa Ly tơplôu ƀă tơbleăng