Po tung 2 hâi lơ 20 ƀă 21/9, Khu kăn ngăn kuăn pơlê pêi chiâk kong pơlê Kon Tum rôh má 9 hneăng hơnăm 2023 - 2028 hiăng ‘nâi nhên pơkâ, troăng rơhlâ ki kal tung tơdroăng cheăng dêi Khu ƀă tơdroăng mơhnhôk kuăn pơlê 5 hơnăm la ngiâ. Hneăng hôp mâu Khu ngăn kuăn pơlê pêi chiâk kong pơlê Kon Tum rôh má 9 ai 277 ngế hiăng teăng mâ ăm lối 65 rơpâu ngế ki pêi chiâk tung kong pơlê.

Hneăng 2023 - 2028 hneăng hôp tối hên tơdroăng pơkâ ki kal, pơkâ mơjiâng Khu ngăn kuăn pơlê pêi chiâk rêm râ tung kong pơlê rơdêi tung tŭm tơdroăng; Hnê tối, mơhnhôk kuăn pơlê mơnhông pêi chiâk, mơjiâng thôn pơlê nếo; Tơmâng kring vế hnoăng ki pơxúa tro luât dêi mơngế kuăn pơlê pêi chiâk; Mơdêk tơdroăng mơhnhôk “Kuăn pơlê tơ’noăng pêi chiâk tê mơdró rơkê, môi tuăn kum dêi rơpó pro kro mơdrŏng ƀă xăm kơtiê krá ton’’ rơtế ƀă mơhnhôk “Pro pơ’lêh tuăn tơmiât, túa pêi cheăng dêi hdroâng kuăn ngo, pro ăm kuăn ngo mơ-eăm pêi cheăng vâ hluăn kơtiê krá ton’’, veăng mơjiâng Kon Tum mơnhông rĕng ƀă krá ton.  

Hneăng hôp mâu Khu ngăn kuăn pơlê pêi chiâk Kon Tum rôh má 9 hneăng 2023-2028  rah xo mâu kăn cheăng hneăng ki nếo ai 32 ngế. Pôa Nguyễn Quang Thủy châ rah xo pro kăn hnê ngăn Khu ngăn kuăn pơlê pei chiâk kong pơlê Kon Tum.