Troh nôkố kong pơlê Kon Tum hiăng tơbleăng tíu ‘măn tơmeăm kal xúa tơdjuôm ƀă tíu ‘măn hlá mơ-éa ki kal điê̆n tưh ăm ngế krê, khu tơrŭm tung tíu dịch vụ công trực tuyến dêi kong pơlê; mâu hlá mơ-éa ki kal ‘na tíu kuăn pơlê rêh ối, khăm pơlât, hnê hriâm, kong kế, hyôh kong prâi ƀă pêi chiâk deăng châ pêi pro krâu khât; lối 98% ngế veăng roê Ƀaoh hiêm xah hô̆i, Ƀaoh hiêm khăm pơlât hiăng châ pơkâ pêi tơdâng tơ’mô ƀă mơnhên tung mâu tíu ‘măn rak tơdroăng kal tơnêi têa ‘na tíu kuăn pơlê rêh ối; tâi tâng mâu tíu khăm pơlât pêi pro nâp liăn ôh tá xúa liăn mâ xếo ƀă hên ki ê.

A Rôh hôp, mâu kăn hiăng tơbleăng hên tơdroăng ki veăng tăng ‘nâi ƀă tơkŭm tơpui tơno ƀă mâu tơdroăng ki kal tung hnoăng cheăng pơhlêh kơxô̆ dêi kong pơlê; tơkŭm tơpui tối leăng, tối ăm dêi rơpó mâu túa pêi ki tro ‘ló, túa ki rơkê tơtro tung pơla pêi pro pơhlêh kơxô̆. Mơnhên pơhlêh kơxô̆ cho môi tung mâu ivá vâ mơnhông cheăng kâ rêh ối pơlê pơla, Vi ƀan hnê ngăn kong pơlê Kon Tum pơkâ thế rêm râ, rêm kơvâ cheăng xo kuăn pơlê, khu mơdró kâ pro tíu ki xiâm, pro ngế ki kal tung pơhlêh kơxô̆ ƀă tơdroăng ki xiâm cho vâ gum kuăn pơlê, khu mơdró kâ.