VOV4.Xơ Đăng - Vâ rak tơniăn troăng prôk tung rơnó mê hngê hơnăm kố, nôkố, kơvâ ngăn troăng prôk ƀă khu kăn pơkuâ 10 tơring, pơlê kong kơdrâm dêi kong pơlê Kon Tum dế mơdêk rĕng tơdroăng ki ‘mâi rơnêu mâu tíu ki tơhnah tơhnâp hiăng xing xoăng kơxô̆ liăn.

Môi tíu ki tơhnah tơhnâp kal rĕng châ ‘mâi rơnêu a tơring Đăk Glei, kong pơlê Kon Tum

Rơtế ƀă mê, hlối mơdêk hnoăng cheăng lăm pơtrui ngăn, mơnhên mâu tíu ki mơni kô tơ’lêi tơhnah tơhnâp a mâu troăng prôk vâ tâp kơƀăng tơbleăng ăm kuăn pơlê ‘nâi vâ hbrâ ví. Mâu tíu pêi cheăng, tơring, cheăm xuân hbrâ rơnáu mơjiâng túa pơlâ hbrâ ví, hbrâ rơnáu kơmăi kơmok, mâu ngế cheăng vâ pêi pro hnoăng cheăng tŏng kum, ƀă ‘mâi mơnhông mâu tơdroăng ki tro tơ’nhiê drêng ai kong mê, têa kân.

Vâ rak tơniăn troăng prôk a kong pơlê hdrối vâ troh a rơnó mê hơnăm kố, kơvâ ngăn troăng prôk kong pơlê Kon Tum xuân hiăng hbrâ rơnáu vâ chê 300 tíu ki ‘măn hmốu, dâng 1.400 met khô̆i hmốu, 1 to kông vế ƀă 3 to kông ki pro ƀă meăm thep vâ hbrâ rơnáu tơbleăng ‘mâi mơnhông drêng ai tơdroăng ki tro tơ’nhiê xua kong mê pro a mâu troăng prôk.

Katarina Nga tơplôu ƀă tơbleăng