VOV4.Xơ Đăng - Ôh tá châ 1 khế xếo cho hiăng troh hneăng tơ’noăng mơgêi hriâm râ má pái phôh thông, a Kon Tum tung pơla kố, mâu hngêi trung dế mơdêk hnoăng cheăng hnê ăm mâu hok tro rơbot ƀai vâ hbrâ tơniăn, khên rơkê  drêng pro ƀai tơ’noăng. Hneăng tơ’noăng mơgêi hriâm râ má pái phôh thong hơnăm kố kong pơlê Kon Tum ai lối 4 rơpâu 700 ngế hok tro chêh inâi tơ’noăng.

Vâ tối tro tơdroăng, Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Kon Tum hnê mơhno ăm mâu hngêi trung tơkŭm po ăm tâi tâng mâu hok tro lăm 12 mơnúa tơ’noăng vâ tối nhên, séa ngăn vâ teăm tơ’nôm, ‘mâi hơ’lêh tơdroăng hnê mâu ƀai rơbot tơrêm môn tơ’noăng kum hok tro tơ’lêi rĕng pâ ƀai hnê vă chôu vế tung tuăn ngôa ƀai hnê. khu xiâm ngăn hnê hriâm ƀă hnê mơjiâng tuăn ngôa rơkê dêi kong pơlê Kon Tum tiô tối hdrối kô mơjiâng 12 tíu tơ’noăng, ƀă 203 to veăng tơ’noăng, 41 veăng ki kôm ƀă hbrâ rơnáu.

Vâ hneăng tơ’noăng tơniăn, kơtăng, pêi tro tiô pơkâ, Khu hnê mơhno hneăng tơ’noăng mơgêi hriâm râ má pái phôh thong hơnăm 2022 kong pơlê Kon Tum xuân hiăng tơbleăng troăng rơhlâ tơniăn ăm mâu hok tro kơpong hơngế hngo tung pơla lăm tơ’noăng ƀă hbrâ tíu ăm kâ koi pơtê. Mơhno mâu tíu tơ’noăng ăm tơ-tro ƀă tơdroăng ki khât ƀă hlối tơ’lêi ăm hok tro.

Gương tơplôu ƀă tơbleăng