Klêi kơ’nâi hên hdroh po roh hôp, tơdroăng tơpui ‘na Kơphế Mơdró kâ-Mơngế tê mơdró tơkŭm po rêm khế dêi Vi ƀan hnê ngăn kong pơlê Kon Tum hiăng chiâng tíu ki mâu khu mơdró kâ mơ’no liăn pơtâng tối, tơbleăng ‘na mâu tơdroăng ki dế trâm tung pêi chiâk pêi deăng, mơ’no liăn cheăng, tê mơdró rơtế ƀă mâu tơdroăng ối trâm pá ‘na chêh tối tung hlá mơ-éa kal athế ai troăng hơlâ tŏng kum.

Môi tiah tơdroăng dêi môi khu mơdró kâ mơ’no liăn cheăng, chiâ xo tơmeăm khoăng tung kơdâm tơnêi, maluâ châ ai khu ki mơ’no liăn vâ pêi cheăng la ôh tá chiâng vâ chiâ xo tơmeăm tung kơdâm tơnêi, xua ôh tá ai phep pro tơdjêp troăng troh a troăng kân kơxô̆ 24 vâ pơto chơ kế tơmeăm.

Pôa Hùynh Thanh Tú, teăng mâ khu mơdró kâ ai tối tiah kố:

‘’Tơdroăng tơkêa bro dêi Kŏng ti Hòang Khánh Trâm a tơring Kon Plông. Kố cho tơdroăng tơkêa bro chiâ xo tơmeăm khoăng tung kơdâm tơnêi tiô tơdroăng pơkâ dêi Tơnêi têa. Vi ƀan hnê ngăn kong pơlê hiăng pơkâ, vê hdró ‘na tơdroăng châ xo tơmeăm khoăng ƀă mơ’no vâ tê. Khu mơdró kâ hiăng châ tơdah xo ‘na tơdroăng chiâng phep pơkâ yă hơnăm 2019.

Kĭ ăm phep mơ’no liăn tŭm têk mê nôkố pâ phep hlá mơ-éa vâ chiâ xo tơmeăm khoăng tung kơdâm tơnêi, mê Khu ngăn ‘na troăng prôk-rơxế kơtâu tối, troăng ki mê ôh tá chiâng phep pro tơdjêp, drêng ôh tá ai hlá mơ-éa phep. Tiah mê, tơmeăm ki kố cho tơmeăm dêi Tơnêi têa, tê ăm vâi klêi mê pó ôh tá ăm vâi chơ’’.

Tơdroăng Kơphế Khu mơdró-Mơngế mơdró kâ dêi kong pơlê Kon Tum cho tíu ki pơkuâ ngăn kong pơlê tơmâng ƀă hlo nhên tơdroăng ki vâ pêi pro dêi Kơ koan ngăn ‘na tơdroăng cheăng. Môi tiah tơdroăng dêi Kŏng ti Hòang Khánh Trâm, pôa Lê Ngọc Tuấn, Kăn xiâm hnê Vi ƀan kong pơlê Kon Tum tối, ti xê bu hlo ki pá dêi môi khu mơdró kâ mê ối hlo tơdroăng ki tá hâi tơtro tung tí tăng rah xo khu ki chiâ xo tơmeăm khoăng tung kơdâm tơnêi a kong pơlê ƀă kal athế hnê mơhno tối athế pêi pro nhên troh a xiâm rêi ga:

‘’Ki kố, pôi tá ăm khu ki mơ’no liăn tro mơhrê liăn ngân tê kơtê. Pơcháu ăm Khu ngăn ‘na troăng prôk-rơxế kơtâu hnê tối ăm khu mơdró kâ mơ’no liăn cheăng pro ti lâi vâ ga tơniăn rĕng, klêi mê, tối tơbleăng ăm Vi ƀan. Ing nôkố troh a la ngiâ, tâi tâng mâu tíu ki chiâ xo tơmeăm tung kơdâm tơnêi, vâ xúa ing tơmeăm mê athế tơniăn tâi tâng mâu tơdroăng, klêi mê nếo tơbleăng ăm khu mơ’no liăn cheăng. Tâng khu ki lâi hiăng châ tơkêa vâ pro, mê athế pêi pro yôh, ôh tá ai tơvâ tơvân ki klâi xếo. Hdrối nah, pó pêi pro tá hâi klêi, klêi tăng châ ai khu ki vâ pêi, mê tơdroăng ki vâ pêi pro mê troh a tơnêi hbrâ vâ pro đông lêng, klêi mê, tro tơdjâk troh kong, tro troh tíu ki vâ tơkoh. Tơdroăng ki kố troh la ngiâ, ôh tá ai tơdroăng ki xía vâ tiah mê’’.

Tiô pôa Trương Lê Mãnh, Kăn hnê ngăn Khu mơdró kâ hơnăm ối nếo kong pơlê Kon Tum, mâu khu mơdró dêi kong pơlê nôkố hiăng ai tơdroăng ki tơ’lêi hlâu vâ trâm khu kăn pơkuâ kong pơlê tăng troăng vâ châ ai khu ki mơ’no liăn, lơ tơpui tối dêi mâu tơdroăng pói rơhêng vâ, tơpui ‘na mâu tơdroăng ki ối tơvâ tơvân, pá puât. Mâu tơdroăng ki trâm tiah mê xuân hlo ối hên khế hdrối mê hía nah, Tơdroăng hôp Kơphế Khu mơdró-Mơngế mơdró lơ ing tơdroăng ki tơpui kâ ƀă khu mơdró dêi kong pơlê châ tơkŭm po 6 khế môi hdroh.

Pôa Trương Lê Mãnh ai tối tiah kố, kố cho troăng hơlâ ki tơpui tơno châ tơƀrê khât:

‘’Tung mâu tơdroăng ki tơrŭm tơpui kâ xuân môi tiah tơdroăng Kơphế khu mơdró-Mơngế mơdró xua Vi ƀan hnê ngăn kong pơlê tơkŭm cho môi tung tơdroăng tơbleăng châ tơƀrê vâ khu kăn pơkuâ ngăn châ ‘nâi nhên, ƀă tah lôi mâu tơdroăng ki xahpá, tơvâ tơvân ki má môi ăm khu mơdró kâ, khu ngế ki mơ’no liăn cheăng. Mâu kăn pơkuâ ngăn kong pơlê hiăng pâ phep, ôh tá xê to tơdroăng ki tơmâng hmâng to lo vâ, ôh tá ai ví tơdroăng ki pá puât ƀă hên mâu tơdroăng ki pá puât ki Khu mơdró kâ châ trâm, hnê tối, ai troăng hơlâ tah lôi mâu tơdroăng ki tơvâ tơvân tung pêi cheăng kâ, tê mơdró dêi Khu mơdró tung hnoăng cheăng dêi Vi ƀan hnê ngăn kong pơlê pơkâ’’.

Sap ing hơnăm 2022 troh nôkố, kơnôm ing tơdroăng tơrŭm tơpui kâ ƀă Tơdroăng kơphế Khu mơdró-Ngế mơdró kâ, khu kăn pơkuâ kong pơlê Kon Tum hiăng vêh mơnhên 136 tơdroăng ki teăng mâ khu mơdró kâ hiăng pâ thế ƀă kong pơlê.

Ƀă mâu tơdroăng ki ối tơvâ tơvân hiăng châ khu kăn xiâm pơkuâ hnê ngăn kong pơlê Kon Tum pơkâ thế tah lôi tơdroăng. Mâu tơdroăng ki ối tơvâ tơvân ai tơdjâk troh hên râ, hên cheăng, mê khu kăn pơkuâ ngăn kong pơlê hiăng vêh mơnhên hnoăng cheăng, pơcháu hnoăng cheăng nhên ăm tơrêm kơ koan, tíu pêi cheăng, khu kăn pơkuâ tơkŭm tah lôi ki xahpá ăm khu mơdró. Tung 156 tơdroăng mê nôkố hiăng ai 126 tơdroăng châ tơleăng mơnhên, 10 tơdroăng ki u ối dế châ pơtối tăng troăng hơlâ vâ tah lôi.

Jâ Hồ Thị Kim Oanh, Kăn pơkuâ ngăn Kŏng ti tơlo liăn cheăng ngăn ‘na pơkeăng Lâm Thịnh Kon Tum tối ăm ‘nâi, nếo pơxiâm mơjiâng tơdroăng mơjiâng Kŏng ti hơnăm 2019 mê trâm xahpá xua pơreăng COVID-19, tung pơla tơkâ luâ xahpá, vêh mơnhên kế tơmeăm ki xiâm Ché sâm a kơchơ, Kŏng ti đi đo châ xúa tơdroăng ki rơtế pê pro, tơdroăng tŏng kum ing khu râ kăn pơkuâ ƀă kơvâ cheăng dêi kong pơlê Kon Tum:

‘’Khu mơdró kâ pơxiâm tăng cheăng pêi mê ga hmâ trâm hên tơdroăng pá puât laga, kơnôm châ ai tơdroăng ki tơ’lêi hlâu, mê cho tơdroăng tŏng kum ing mâu troăng hơlâ dêi kong pơlê. Ki ‘ló hơniâp ro, mâu hâi achê pơla kố, kong pơlê hiăng tơkŭm pêi pro mâu tơdroăng ki tơrŭm cheăng, pơkâ pêi pro ƀă ki rơhêng vâ tối cho tah lôi mâu tơdroăng ki khu mơdró kâ ai kơ-êng, ki pá puât dêi khu mơdró. Tơdroăng Kơphế Khu mơdró a khế hdrối nah, Kŏng ti ngin hiăng ai pơkâ, ai troăng hơlâ vâ thăm mơdêk tơdroăng pêi chiâk pêi deăng tung mâu kơchơ ki trâm pá. Khu kăn pơkuâ kong pơlê hiăng tối pơtroh tơdroăng ki pói rơhêng vâ mê dêi ngin troh a Khu ngăn ‘na Khoa hok ƀă cheăng kơmăi kơmok. Dế nôkố, ngin dế pêi cheăng ƀă khu mơdró kâ ki ai hnoăng cheăng hnê mơhno xuân cho vâ hbru ăm chưng chih ISO’’.

Tơdroăng ki xiâm rơtế tah lôi ki xahpá ăm Khu mơdró kâ vâ mơnhông dêi kong pơlê Kon Tum hiăng châ mơnhên tối tung khu mơdró kâ ki dế pêi cheăng, tê mơdró ƀă khu mơ’no liăn séa mơnhên ngăn tối ‘ló khât ‘nâng. Khế 4/2023 a Leh tối tơbleăng kơlo ki tơbriât tê mơ’no râ kong pơlê hơnăm 2022 xua Khu tơrŭm Mơdró kâ ƀă Cheăng kơmăi kơmok Việt Nam tơkŭm po, Kon Tum hiăng kơdrâ hlo tơviah drêng mơdêk 24 kơlo tâng vâ pơchông ngăn ƀă hơnăm 2021, ối má 37/63 kong pơlê, pơlê kong kân. Kố cho ối a kơlo ki a ‘ngêi ó má môi dêi kong pơlê ki hiăng châ pêi pro tung plâ 16 hơnăm hdrối mê hía nah.

Vâ tơdroăng rơtế pêi pro mê tah lôi ki xahpá ăm khu mơdró kâ châ mơnhông rế hía rế tơtêk păng ‘nâng, châ tơƀrê, kong pơlê Kon Tum dế tơkŭm rak vế, pêi pro hên troăng hơlâ vâ pơtối ‘mâi rơnêu tơdroăng ki mơ’no liăn cheăng, thăm mơdêk ivá tơbriât tê mơdró kâ.

Tơdrêng ƀă hnoăng cheăng ki mê ai troăng hơlâ ki kơjo kum mơnhông ó rơdêi kơpong pêi cheăng kâ dêi khu krê, pơxiâm tăng tơdroăng cheăng ki tơ’ló khât; ing mê, mơjiâng chiâng tơdroăng ki tơdâng tơ’mô vâ khoh châ ai ivá cheăng pơla khu râ tung khu mơdró kâ, khu ki mơ’no liăn cheăng; thăm mơdêk tơdroăng pơkâ mơ’no rak vế, pêi pro hnoăng cheăng Kŏng ngê̆ pơtâng tối tơdroăng nếo ai, hơ’lêh kơxô̆; thăm mơdêk ivá cheăng dêi khu kăn ƀô̆, ki cheăng ăm tơnêi têa, mâu ngế ki ai hiâm mơno, veăng kum ăm khu mơdró kâ.