VOV4.Xơ Đăng - Ƀă inâi: “Tơrŭm pơlê pơla – tơdjâk tơdroăng pêi pro tŏng kum”, kơxo lơ 9/5, a pơlê kong kơdrâm Kon Tum, Khu lo tŏng veăng kong pơlê Kon Tum tơkŭm po Leh tơbleăng Khế tŏng hơnăm 2022. Tung khế tŏng kum hơnăm kố, Khu lo tŏng veăng kong pơlê Kon Tum mơ-eăm kum sap ing 3 rơpâu troh 5 rơpâu ngế ai tơdroăng rêh ối xơpá; Mơjiâng pro 8 toăng hngêi Khu lo tŏng veăng lơ kế tơmeăm ki pro pơxúa ăm pơlê; Tơkŭm khăm, tiâ mơnhên ivá, hbru pơkeăng tê kơtê ăm kuăn pơlê kơpong xơpá.

Pơ-ôu pơ-eăng khu pú hên veăng tơlo liăn tung tơdroăng cheăng tŏng kum

Khu lo tŏng veăng kong pơlê Kon Tum ăm ‘nâi, vâ pêi pro châ tơdroăng ki tối a kơpêng, Khu lo tŏng veăng kong pơlê Kon Tum kô mơdêk tơdroăng ki tơrŭm pơlê pơla, tơdjâk tơdroăng pêi pro tŏng kum tro môi tiah tơdroăng pơkâ dêi khế tŏng kum hơnăm kố. A leh tơbleăng Khế tŏng kum hơnăm 2022, Khu lo tŏng veăng kong pơlê Kon Tum hiăng tơdah xo va chê 140 rơtuh liăn sap ing mâu khu pú hên ƀă mâu ngế krê tŏng kum ăm.

Katarina Nga tơplôu ƀă tơbleăng