Tung kơmăng Tĭng kân Noel mâu Hngêi khôp a kong pơlê Kon Tum, malối a mâu hngêi khôp kân, cho hngêi khôp pro ƀă loăng, Hngêi khôp Tân Hương... xuân hlo eăng tơpok mâu on hên mơngiơk. Sap ing apoăng hiăng ai krâm kuăn pơlê troh khôp a kơmăng hâi Tĭng kân hrăng kơmăng hâi Tĭng kân Pâ Xeăng chu chiâng kuăn mơngế.

Tung hiâm mơno hơniâp ro tơkŭm dêi rơpó, hên ngế kuăn pơlê ôh tá tiô khôp xuân troh lăm ngăn xah hêi ro veăng  tơdah hơnăm nếo phiu ro hơniâp lĕm. Ƀok Trần Tấn Việt, Di pơkuâ tơring Khôp xiâm Kon Tum, ăm ‘nâi pêi pro tiô tơdroăng loi tĭng - tiô khôp Pâ Xeăng Việt Nam pơkâ tung hơnăm 2024 cho “mơdêk veăng tung rêh ối dêi mâu kuăn pơlê tiô khôp’’, Kơpong hngêi khôp xiâm hiăng ai tơdroăng pơkâ ki nhên vâ veăng pêi mâu tơdroăng dêi kơpong hngêi khôp xuân môi tiah veăng mơjiâng pơlê xiâm.