VOV4.Xơ Đăng - A pơlê kong kơdrâm Kon Tum, Tĭnh đoân Kon Tum tơrŭm ƀă Khu pơkuâ hnê hriâm ƀă hnê mơjiâng tuăn ngôa rơkê kong pơlê tơkŭm po hneăng tơ’noăng tin hok hơnăm ối nếo kong pơlê Kon Tum roh má XXII hơnăm 2022. Veăng hneăng tơ’noăng Tin hok hơnăm ối nếo kong pơlê Kon Tum roh má XXII hơnăm 2022 ai 90 ngế tơ’noăng ing mâu hngêi trung trung hok, râ má môi ƀă râ má pái tung kong pơlê.

Ngoh Xiêng Thanh Phúc, Kăn pơkuâ hnê ngăn Đoân Droh rơtăm Kon Tum diâp ƀâng kơdeăn ăm hok tro châ pri

Mâu hok tro mơhno dêi ivá hriâm tin hok dêi tơná ing troăng tơ’noăng pro tơdrêng a kơmăi tung mâu nâl lâp trình vâ pro mâu ƀai toăn a 3 ƀảng: Ƀảng A xúa nâl SCRATCH lơ Python vâ pro mâu ƀai toăn ối tung tơdroăng râ má môi; Ƀảng B ƀă ƀảng C xúa nâl lâp trinh Free Pascal, DevC++, CodeBlock, Python vâ pro mâu ƀai toăn râ má péa, râ má pái. Klêi kơ’nâi tơ’noăng, Khu tơkŭm po hiăng diâp ăm pri ăm 31 ngế ki rơkê má môi.

A Sa Ly tơplôu ƀă tơbleăng