VOV4.Xơ Đăng - Rơtế ƀă tơdroăng hbrâ vâ hneăng tơ’noăng mơgêi râ má pái phôh thong hơnăm kố tơkŭm po tơniăn, kơtăng, mâu râ ƀă mâu kơvâ cheăng a kong pơlê Kon Tum xuân hiăng ai pơkâ tŏng kum mâu hok tro ai tơdroăng rêh ối pá puât. Xêo troh nôkố, tung tâi tâng kơxô̆ lối 4.700 ngế hok tro dêi kong pơlê Kon Tum veăng hneăng tơ’noăng mơgêi râ má pái phôh thong hơnăm kố, ai lối 1.200 ngế hok tro hiăng ai inâi tung mơ-éa châ tơdah tŏng kum tơdâng rêm ngế o 314 rơpâu liăn.

Khu rơxế honđa pơto mơngế dêi rơxông ối nếo Kon Tum tŏng kum hok tro tung hneăng tơ’noăng mơgêi râ má pái phôh thong hơnăm 2021

Kơxô̆ liăn tŏng kum ăm hok tro xua Vi ƀan mâu tơring ƀă Khu mơhnhôk hriâm pơlê kong kơdrâm Kon Tum mơhnhôk. Mâu hok tro châ tŏng kum cho mơngế hdroâng kuăn ngo lơ ối tung rơpŏng kơtiê, kuăn tê dêi 28 hngêi trung tung kong pơlê. Rơtế ƀă tŏng kum ‘na tơmeăm khoăng, hdrối ƀă tung mâu hâi tơkŭm po hneăng tơ’noăng mơgêi râ má pái phôh thong, mâu râ ƀă mâu kơvâ cheăng a kong pơlê Kon Tum xuân hiăng ai pơkâ kum mâu hok tro ai tơdroăng rêh ối pá puât. Khu pơkuâ Đoân droh rơtăm kong pơlê Kon Tum tối ăm ‘nâi, rơxông ối nếo Kon Tum hiăng ai pơkâ pêi inhên vâ pêi pro tro tơdroăng ‘’Kum a rơnó tơ’noăng’’ a 12 tíu tơ’noăng ki păng ‘nâng ƀă 9 tíu tơ’noăng ki hbrâ.

A Sa Ly tơplôu ƀă tơbleăng