Veăng troh rôh trâm mâ ai teăng mâ Ngế xiâm pơkuâ ngăn lêng Kuân khu 5, Kăn hnê ngăn kong pơlê Kon Tum ing mâu rơxông hdrối, mâu lêng tơplâ khên tơnôu dêi kuăn pơlê ƀă 185 ngế kăn cho kăn ƀô̆ xiâm dêi lêng ki hiăng pơtê cheăng.

A rôh trâm mâ, mâu kăn rơtế hmâng tơpui tối, ngăn hơdruê xuăng pơxá “80 hơnăm ối pơ-eăng đi đo tơdroăng hơdruê dêi lêng’’, tơbâ tơdroăng ton nah mơhno hnoăng pêi cheăng tơƀrê dêi mâu lêng Kuăn pơlê Việt Nam tung 80 hơnăm hdrối kô nah, veăng kring gak tơniăn pơlê pơla, tơnêi têa, lâp tơnêi têa tơrŭm môi, tơniăn tung lâp lu dêi Tơnêi têa, kring vế ki pơxúa dêi tơnêi têa, hdroâng mơngế; kring vế Đảng, Tơnêi têa, Kuăn pơlê ƀă tơdroăng rêh ối tiô troăng hơlâ xah hô̆i chuh ngiah; rak tơniăn kal kí, tơdroăng ki hơniâp lĕm vâ mơjiâng ƀă mơnhông dêi tơnêi têa rế xông tơƀrê .