Tâi tâng ƀăng tơnêi ki xo tơvêh kố châ Vi ƀan hnê ngăn kong pơlê Kon Tum pơcháu ăm Vi ƀan hnê ngăn pơlê kân Đăk Glei, tơring Đăk Glei pơkuâ ngăn tiô pơkâ. Kŏng ti Tơlo liăn Hngêi kơmăi VGR Ngọc Linh ai hnoăng cheăng vêh pơcháu tơnêi, tâng ôh tá pêi pro tiô tơdroăng pơkâ mê kô tro mơdât tiô pơkâ dêi luât.

Chiâng ai tơdroăng ki Vi ƀan hnê ngăn kong pơlê Kon Tum pơkâ xo tơvêh tâi tâng ƀăng tơnêi hiăng ăm Kŏng ti Tơlo liăn Hngei kơmăi on tơhrik VGR Ngọc Linh mung tơnêi, pơcháu tơnêi vâ bro hngêi kơmăi on tơhrik Đăk Ruồi 2 ƀă Đăk Ruôi 3 tơdjâk troh hên hĭn mâu tơdroăng xôi dêi Kŏng ti kố, môi tiah: hrá xúa tơnêi luâ 24 khế tâng vâ pơchông ƀă tơdroăng pơkâ ki cheh tung tơkêa ‘no liăn; ôh tá chêh bro mơéa vâ pơkâ thế mơdon hâi khế ki xúa tơnêi; mơjiâng bro ƀơrô cheăng pơkuâ, kơpong pơkuâ tơdroăng tơkêa, bro troăng prôk ƀă hên tơdroăng ki ê ôh tá ối tung tơdroăng ki châ pơcháu tơnêi, ăm mung tơnêi.