Xá kong kơxô̆ 547A, kơpong kong dêi Kŏng ti rak ngăn kong Ƀuôn Ja Wầm (a tơring Čư Mgar, kong pơlê Dak Lak) mâu khế achê kố đi đo tro ko ‘nhê. A kơpong kơtăn Tíu pơkuâ gâk ngăn kong kơxô̆ 1 tá hâi châ 100m, achê troăng kŭn, dâng 1ha kong tro ko ‘nhê, loăng kong ối ‘măn hơ’gok hơ’gâ. Rơtâ tá mê, hên loăng tro dri hiăng răng hlâ, ai loăng ki ‘nâ mê hŏn, hlâ chôa ‘lâng.

Pôa Trần Hồng Minh, ngế pêi cheăng Tíu pơkuâ gâk ngăn kong kơxô̆ 1 tối ăm ‘nâi, mâu ngế ki kếo ‘nhê kong ôh tá xâu kơbố. Ôh tá kal ‘nâi a chê lơ hơngế, tâng ối kong mê ối tro ko ‘nhê. Drêng châ hlo, mơdât mê vâi kô tơtrâ, thăm nếo djâ dêi pú mơnhâu, pâm xiă. Ƀă pôa Minh a poăng khế 6 pơla kố nah xuân hiăng tro chât ngế pâm xiăn bê mot tung hngêi pơkeăng:

"Kuăn pơlê vâi xĕn rêh ối lâp lu tung kong, vâi hdi xo hmâng vâ xua mê cho pá ‘nâng. Nôkố cho pá puât, á hâi ki mê nah lăm pêi cheăng mê vâi hôu mot a tíu pêi cheăng vâi pâm xiăn bê mot khăm pơlât, vâi ôh tá bê xâu kơbố ôh’’.

Rơtế ƀă Xá kong kơxô̆ 547A, hên xá ki ê dêi Kŏng ti gak ngăn kong Ƀuôn Ja Wầm kong xuân dế tro ko ‘nhê. Tơdroăng ki ôh tá bê tơmâng bê xâu, khên tơnôu mơhno nhên a mâu ƀăng deăng kong ối achê mâu tíu pơkuâ gak ngăn kong, ối a chê mâu troăng kân ki xiâm đi đo ai ngế prôk lăm. A mâu ƀăng kong tro ko ‘nhê hơ’gok hơ’gâ, mâu loăng plâi iâ hâi môi tiah prá, alâi hiăng châ pêt tơvât tung ƀăng mê môi tiah troăng khu tong kếo ‘nhê kong mơnhên ‘’hnoăng pơkuâ’’.

Pôa Nguyễn Công Thắng, Kăn pơkuâ Tíu gâk ngăn kong kơxô̆ 3 khéa hơ‘nêng ôh tá ‘nâi pro ti lâi mâu tơdroăng kếo ‘nhê kong, hdi xo tơnêi. Tơdroăng cheăng hiăng hngăm, rơ-iô laga pêi lo liăn ôh tá tơniăn. Hiăng 5 khế hiăng hluâ, nhŏng o a tíu pêi cheăng tá hâi châ xo liăn khế. Kơxô̆ mơngế pơtê cheăng rế hía rế hên, ki hngăm tơdroăng cheăng rế hía rế kân:

"Kuăn pơlê xĕn ối hmâng vâ mot a kố mê vâi ‘nhê hên tơdrêng amê khu cheăng ngin mê iâ, pá puât nâng ăm nhŏng o. Nhŏng o lăm pêi cheăng mơngế iâ, kuăn pơlê vâi rêh ối tung dế kong mê ai hên drêng pin ôh tá kâi pơkuâ. Liăn khế mê nhŏng o ai ngế 3 rơtuh liăn, ngế 5 rơtuh liăn, pêi tá hâi leh, hâi tĭng ôh tá châ pơtê ôh. Liăn khế mê nôkố kŏng ti ối chěn 5 khế. Ai ngế ki ‘nâ vâi hiăng pơtê, tơdroăng rêh ối nhŏng o tá hâi châ tơniăn ôh’’.

Pôa Nguyễn Tất Văn, Kăn pơkuâ Kŏng ti gak ngăn kong Ƀuôn Ja Wầm tối ăm ‘nâi, riân troh apoăng khế 9, tung kơpong kong tíu cheăng pơkuâ ai 303 roh ‘nhê kong ƀă ƀăng deăng lối 96ha. Tung mê, 99% kơxô̆ roh ôh tá mơnhên ‘nâi mơngế ki ‘nhê kong. Tung kơxô̆ 8.800ha tíu cheăng pơkuâ, nôkố bu u ối dâng 3.000ha ai kong, laga dế rế hía rế kơdroh:

"Ko ‘nhê kong, hdi xo tơnêi kong, kơpong kong kŏng ti pơkuâ apoăng hơnăm troh nôkố cho hên ‘nâng, mâu roh tâk hên. Ki nhên khât kong a Ƀuôn Ja Wầm nôkố ki hên cho kong ôh tá lĕm xếo ƀă kong ki ai hên loăng pơlái kong kế ki ê xua mê tơdroăng kếo ‘nhê kong ai tung môi pơla iâ laga ƀăng deăng cho kân xua mê kơxô̆ loăng iâ ƀă loăng kŭn’’.

Pôa Trương Văn Dự, Kăn pơkuâ gâk ngăn kong tơring Čư Mgar, kong pơlê Dak Lak tối ăm ‘nâi, tơdroăng pơkuâ, gak ngăn kong a Kŏng ti gak ngăn kong Ƀuôn Ja Wầm dế ôh tá tơniăn. Ƀă 9 ngế kăn ƀô̆ pơkuâ, khu cheăng dêi kŏng ti kố ôh tá tơniăn pơkuâ 8.800ha kong ƀă tơnêi têa.

Drêng ki ôh tá tơniăn, Khu cheăng thế pơtroh sap ing 7 – 8 ngế kăn ƀô̆ rơtế gak ngăn kong Ƀuôn Ja Wầm, laga bu châ kơdroh môi pơla, drêng khu gâk ngăn kong vêh mê kong pơtối tro ko ‘nhê. Nôkố Kŏng ti gak ngăn kong Ƀuôn Ja Wầm hiăng châ pro chiâng kŏng ti 2 khu tơrŭm cheăng, ai khu krê pakong veăng laga tá hâi hlo châ tơƀrê:

"Á mơnhên ivá pơkuâ dêi kŏng ti nôkố cho tá hâi hôm ‘nhiah, ôh tá ai ivá vâ pơkuâ, gak ngan kong. Nôkố kŏng ti hiăng tơpui tơno cho rah xo mơngế pơkuâ, gak ngăn kong laga ƀă tơdroăng ối chěn môi tiah kố mê ôh tá ai kơbố vâ mot a kố pêi ôh. Ngin xuân hiăng pơkâ thế Khu pơkuâ ‘na pêi chiâk deăng tơpui ƀă kong pơlê, kong cho xua kong pơlê pơcháu xua mê thế ai tơpui ƀă khu ki pơkuâ kong xing xoang kơxô̆ liăn, khu ngế gak ngăn chiâng rơdêi vâ pêi pro hnoăng cheăng séa ngăn ƀă mơdât tơdroăng kếo ‘nhê kong’’.

Plâ hên hơnăm hiăng hluâ, a Kŏng ti gak ngăn kong Ƀuôn Ja Wầm đi đo tro ko ‘nhê kong, tơnêi kong chiâng kơƀăn dêi khu tong kếo loăng kong. Lối 5.800 ha tung tâi tâng 8.800 ha hiăng ôh tá ai kong xếo, dâng 3.000ha ki ê ai kong laga kong ôh tá lĕm xếo. Ƀă tơdroăng ki tro kếo ‘nhê kong hmâng vâ tiah kố, khu kếo ‘nhê kong ôh tá bê tơmâng, ôh tá bê xâu luât môi tiah kố, kong a Ƀuôn Ja Wầm kô tơ’lêi tro hía tâi tâng./.