Sap ing hâi lơ 1/3, hnoăng cheăng hbru nếo ƀă pơhlêh mơ-éa phep vê rơxế châ pơcháu ăm Khu ngăn troăng prôk ƀă rơxế kơtâu (nôkố cho Khu mơjiâng tơmeăm khoăng) ăm Kŏng an mâu kong pơlê, pơlê kong kân tung lâp tơnêi têa: A kong pơlê Dak Lak, klêi lối 20 hâi tơbleăng tơdroăng ki hbru pơhlêh mơ-éa phêp vê rơxế ăm kuăn pơlê.

Tơdế khế 2/2025, Kŏng an kong pơlê Dak Lak hiăng hnê mơhno Ƀơrô Kăn sat gâk troăng prôk, Kŏng an mâu cheăm, bêng tơrŭm ƀă Khu mơjiâng pro tơmeăm khoăng tơkŭm po pơcháu, tơdah xo rơxế, kơmăi kơmok tung pơkuâ ngăn ƀă sát hạch hbru ăm mơ-éa phêp vê rơxế. Tơdrêng amê hlối po rôh séa ngăn troăng prôk kih thuât a Khu mơjiâng tơmeăm khoăng ƀă 3 Tíu xiâm sát hạch a kong pơlê, troh nôkố, kŏng an cheăm, bêng tơdah xo 248 hồ sơ, ƀơrô Kăn sat gâk troăng prôk hiăng tơdah xo vâ chê 1.300 hồ sơ ƀă hbru nếo, pơhlêh ăm lối 1 rơpâu ngế.