Hơnăm 2023, tơdroăng vế tơniăn, gak kring pơlê pơla a kong pơlê Gia Lai châ tơniăn lĕm. Pơtối mê, Kŏng an kong pơlê Gia Lai hiăng po 4 roh plâ ƀâ, rup mâu ngế xôi; séa ngăn 863 roh, ƀă lối 1.400 ngế xôi kân; rup 855 ngế, xo tơvêh 6,3 rơtal liăn mơdrếo ăm mâu ngế ki tro ‘nêk. Kơ koan Kan sát séa ngăn mâu râ séa ngăn, mơgêi, pơkâ thế xăm tối 1.100 roh, ƀă lối 2000 ngế xôi; châ hlo xăm tơkêng 17 roh, ƀă 30 ngế xôi ‘na kâ kơhveăm liăn ngân, pro kăn, xo tơvêh lối 3,7 rơtal liăn.

Veăng a hneăng hôp, pôa Trương Hải Long – Kăn phŏ pơkuâ hnê ngăn cheăng Đảng kong pơlê, Kăn hnê ngăn Vi ƀan kong pơlê Gia Lai pơkâ thế, hơnăm 2024 Kŏng an kong pơlê Gia Lai pơtối tơbleăng châ tơƀrê ăm Vi ƀan kong pơlê ‘na tơdroăng rak tơniăn tung kring vế pơlê pơla, rak ngăn cheăng kal kí; thăm tơplâ mơdât ƀă mâu ngế xôi, ki má lối cho tung roh Têt Nguyên đán Giáp Thìn 2024.