Kong pơlê Kon Tum ƀă kong pơlê Attapeau ai tơdjuôm troăng tơkăng kong xŏn lối 75 km ƀă ƀăng kong kơpong tơkăng kân rơdâ dâng 39.000ha. Kong a kơpong kố tơnêi rơnâk ngo ngối, hơngế kơpong kuăn pơlê rêh ối, tung kong ai hên kuăn kiâ kong, nhâ loăng pơlái ki kơnâ xua mê tơ’lêi hlâu ai mâu roh pro xôi ‘na tơdroăng pơkuâ, gak ngăn kong.

Hneăng hơnăm 2024 – 2025, Khu pơkuâ ‘na pêi chiâk deăng ƀă mơnhông thôn pơlê kong pơlê Kon Tum ƀă Khu pơkuâ ‘na pêi chiâk deăng, pêt, gak ngăn kong kong pơlê Attapeau môi tuăn pơtối thăm tơrŭm, tối ăm dêi pó tơdroăng, tơdroăng ki rơkê, túa ki rơkê vâ pơkuâ, mơdât mâu tơdroăng pro xôi tung kơvâ loăng kong; tơrŭm ‘na hbrâ mơdât on chếo kong drô troăng tơkăng kong ối tung péa kong pơlê.

Tiô châ ‘nâi sap ing hơnăm 2016, Khu pơkuâ ‘na chiâk deăng ƀă mơnhông thôn pơlê kong pơlê Kon Tum ƀă Khu pơkuâ pêi chiâk deăng, pêt, gak ngăn kong kong pơlê Attapeau hiăng hôp ‘na gak ngăn kong a kơpong tơkăng kong tơnêi têa kơpong péa kong pơlê. Bu riân krê hneăng hơnăm 2019 – 2023, khu gak ngăn kong kong pơlê Kon Tum hiăng pêi pro vâ chê 600 roh séa ngăn, châ hlo 35 roh pro xôi luât kong. Khu cheăng hiăng kong pơlê Attapeau xuân hiăng tơkŭm po 79 roh séa ngăn, rup xo lối 48 met khô̆i loăng, mâu kuăn kiâ kong ƀă hên loăng ki ê.