Châ tơkŭm po ƀă tơdroăng hôp mơ’no tơdrêng tiô troăng hyôh rơ’jíu ƀă mâu tíu mơ’no xiâm a Hngêi hôp kân Ngọc Linh, a pơlê kong kơdrâm Kon Tum, hâi Hôp tơbleăng tơdroăng hiăng pê klêi dêi rôh hôp kân xiâm má 8, hneăng 13 ƀă tơbleăng pêi mâu Pơkâ, tơdroăng hnê mơhno dêi Đảng xua Khu ngăn Đảng kong pơlê Kon Tum tơkŭm po tơdjêp ƀă 128 tíu hôp veăng hôp mê ai lối 6 rơpâu 300 ngế đảng viên.

A rôh hôp, mâu đảng viên tâng tơdroăng tơbleăng ‘na tơdroăng hiăng pêi pro dêi rôh Hôp xiâm tơnêi têa má 8, hneăng 13. Tơdrêng amê, mâu đảng viên veăng hôp xuân hiăng hnê tối tâng tơdroăng pơkâ kơxô̆ 24, hâi lơ 13/7/2023 dêi Khu xiâm kal kí ‘na kring tơniăn tơnêi têa tung tơrŭm cheăng lâp plâi tơnêi tung mâu tơdroăng cheăng, trâu rơdâ; pơkâ kơxô̆ 41, hâi lơ 10/10/2023 dêi Khu xiâm Kal kí ‘na mơjiâng ƀă pơtối rak vế hnoăng cheăng dêi mâu khu mơdró Việt Nam tung chal nếo.

Đảng ƀô̆ Kon Tum nôkố ai 14 Đảng ƀô̆ dêi kong pơlê ƀă 668 khu tơrŭm cheăng Đảng tơring cheăm ƀă lối 31 rơpâu 300 ngế đảng viên.