Kong pơlê Kon Tum nôkố ai lối 215.000 ngế khôp Pâ xeăng, châ 40% kơxô̆ mơngế tung lâp kong pơlê. Tung mê, mâu hơnăm hdrối nah, kong pơlê Kon Tum hiăng tơmâng khât séa ngăn tiô hnoăng pơkuâ lơ tí tăng ‘nâi plĕng ăm mâu râ kăn mơnhên teăm tơdrêng  tơdroăng púi vâ, pâ thế tơxâng, tơtro dêi mâu khu tơrŭm cheăng, mâu ngế ki loi tĭng, tiô khôp.

Ing mê, tơdroăng khôp rế rak vế pêi pro tro tiô pơkâ dêi tơdroăng loi tĭng. Ing mê, tơdroăng tiô khôp rế rak vế tro tiô luât, kuăn pơlê ki tiô khôp Pâ Xeăng veăng pêi hên tơdroăng tŏng kum mâu ki xơpá ƀă tơdroăng mơhnhôk tơ’noăng pâ nhoăm tơnêi têa xua mâu kăn rêm râ mơhnhôk...

Tối tơbleăng a rôh trâm mâ, Kăn hnê ngăn Vi ƀan kong pơlê Kon Tum púi vâ mâu ƀok, mâu ngế pêi hnoăng cheăng loi tĭng, tiô khôp, mâu ƀok moan, yah chĭng, mâu kuăn pơlê tiô khôp pơtối rak vế pêi pro tơdroăng ki lĕm tro, hnê tối kuăn pơlê ki tiô khôp pêi tro tiô tơdroăng rêh ối “ rêh ối lĕm ‘na châ ƀă ‘na mơhúa’’; mơjiâng , ‘mâi mơnhông ki tơrŭm môi tuăn tâi tâng hdroâng kuăn ngo; kơhnâ veăng tơ’noăng pâ nhoăm tơnêi têa, mâu tơdroăng mơhnhôk xua rêm râ, kơvâ cheăng mơhnhôk.