Cô hnê chư Đào Thị Huyền, cô hnê hngêi trung râ má môi Ea Trul, tơring Krông Bông hiăng lối 24 hơnăm hnê hriâm, cô tối ăm ‘nâi, tơdroăng pêi cheăng a cheăm pá puât, 75% hok tro cho kuăn ‘nĕng kuăn pơlê hdroâng kuăn ngo, xua mê hơnăm ki lâi xuân tiah mê, mot apoăng hơnăm hriâm cho mâu thái cô dêi hngêi trung pơtối séa ngăn inâi troh rêm toăng hngêi mơhnhôk hok tro troh lâm hriâm.

‘’Tung tơdroăng hok tro lăm hriâm mâu vâi o xuân hmâ pơtê hriâm xua tơdroăng rêh ối rơpŏng pá puât, nôu pâ pêi cheăng kâ hơngế ôh tá ai kơbố rak ngăn mâu vâi o xua mê ai drêng pơtê, xua mê thái cô pơkuâ lâm troh a hngêi mâu vâi o vâ  mơhnhôk mâu vâi o lăm hriâm, pói vâ mâu vâi o chiâng chư. Tung tơdroăng lăm hnê đi đo troh a hngêi mơhnhôk vâi o lăm hriâm, tá tui lui mơhnhôk vâi o xuân troh a lâm hriâm kơhnâ tâ’’.

Pôa Nguyễn Văn Tiến, Kăn pơkuâ hngêi trung râ má môi Ea Trul, tơring Krông Bông tối ăm ‘nâi, hơnăm hriâm kố, hngêi trung ai vâ chê 650 ngế hok tro. Hngêi trung mơ-eăm 100% hok tro troh lâm hriâm tŭm. Vâ châ pơkâ mơ’no, pakĭng tơdroăng mơjiâng pơkâ pêi, tơkŭm po hôp thái cô pơkuâ, xing xoăng tơdroăng cheăng tơrŭm ƀă  khu râ kăn pơkuâ rêm râ mơhnhôk hok tro troh lâm, hngêi trung ối kơhnâ kơbông krếo mâu khu ki tŏng kum mơngế pá puât tŏng kum mâu hok tro ai tơdroăng rêh ối pá puât vâ mâu vâi o ai liăn hmiân tuăn hriâm tâp.

Pôa Nguyễn Văn Tiến tối:

“Hngêi trung tơdjêp ƀă khu râ kăn pơkuâ cheăm, mâu khu  tŏng kum mơngế pá puât tŏng kum 50 khu kơxop mơ-éa hnê hriâm lâm 4, 500 plâ hmân ếo. Ƀă Khu pơkuâ hnê hriâm – Hnê mơjiâng tuăn ngôa rơkê ƀă Kŏng ti in kơxop hlá mơ-éa tơmeăm khoăng xúa tung hriâm tâp Dak Lak tŏng kum ăm 10 ngế vâi o hok tro lâm môi 10 khu kơxop mơ-éa. Pakĭng mê, hngêi trung hiăng tơrŭm ƀă khu pơkuâ nôu pâ hiăng rôe 500 kơxop mơ-éa chêh ƀă mâu loăng chêh vâ hbrâ ăm mâu muăn sap ing apoăng hơnăm hriâm tâng muăn ki lâi tá hâi ai kơxop mơ-éa chêh, loăng chêh vâ hriâm tâp tung hơnăm 2023 – 2024’’.

Tiô pôa Huỳnh Viết Trung, Kăn pơkuâ Ƀơrô hnê hriâm – Hnê mơjiâng tơring Krông Bông, troh nôkố tâi tâng mâu hngêi trung hiăng hbrâ ăm hơnăm hriâm nếo. Tơmeăm khoăng, khu thái cô hiăng tŭm, tơxâng tiô pơkâ tơdroăng hnê hriâm phôh thong nếo. Hok tro mâu râ tung tơring troh a lâm tŭm. Laga, vâ  mâu vâi o lăm hriâm kơhnâ, ƀơrô Hnê  hriâm – Hnê mơjiâng tuăn ngôa rơkê tơring hiăng ai mơ-éa hnê mơhno mâu tíu cheăng hngêi trung hriâm thăm veăng ƀă khu râ kăn pơkuâ hnê ngăn cheăng Đảng, khu râ kăn pơkuâ tơring rơtế lăm séa ngăn vâ pơtâng tối ăm nôu pâ hok tro tơmâng hên tâ, ăm dêi kuăn ‘nĕng troh lâm hriâm. Pôa Huỳnh Viết Trung tối ăm ‘nâi:

‘’Mơhnhôk hok tro troh lâm hriâm a mâu kơpong pá puât mê hiăng tơniăn, ai kơxô̆ ki iâ ngin xuân hiăng tơrŭm ƀă khu râ kăn pơkuâ cheăm mâu hngêi trung vâ tơmâng hnê mơhno. Tiô pơkâ pêi cho 15/8 mơgêi rah xo hok tro, mơhé mê ngin xuân thế ton tơrôu hâi khế ƀă thăm nếo troh hâi lơ 5/9 mâu o ki lâi tá hâi troh lâm hriâm xuân pơtối mơhnhôk vâ mâu vâi o troh lâm hriâm vâ tơniăn tơdroăng mâu vâi o troh hngêi trung tŭm’’.

Ƀă mâu tơdroăng mơ-eăm dêi kơvâ hnê hriâm tơring Krông Bông, kong pơlê Dak Lak tung tơdroăng mơhnhôk hok tro troh lâm hriâm sap ing mâu hâi apoăng hơnăm hriâm kô cho tơdroăng ki châ hôm khât ăm môi hơnăm hriâm nếo châ tơƀrê hên.