A rôh trâm mâ, mâu kăn hiăng tơbâ tơdroăng hmâ pêi pro ton nah ki lĕm tro dêi kuăn ngo, mâu hnoăng cheăng pêi ki rơdêi dêi mâu Lêng ƀă Kuăn pơlê tung tơdroăng tơplâ, mơjiâng ƀă kring vế Tơnêi têa plâ 80 hơnăm hdrối; tơbâ hiâm mơno pâ nhoăm tơnêi têa, pâ chuh ngiah pơlê pơla, hâk tơngăm hdroâng mơngế, tơdroăng “Ô têa pâ kơnhŏng” , “Pâ mâu ki ai hnoăng tơnêi têa’’; rak tơniăn ƀă pơtối rak vế pêi pro tơdroăng ki lĕm ton nah dêi kăch măng, ki lĕm dêi “Mố đô̆i Pôa Hồ” dêi  mâu Lêng ƀă Kuăn pơlê Việt Nam. 

Đăi tă Lương Đình Chung - Phŏ Chính ủy Lêng Kuân khu 5 púi vâ mâu kăn hiăng krâ dêi kăch măng, kăn lêng, sih quan xiâm hiăng pơtê cheăng pơtối rak vế pêi pro tơdroăng cheăng “Hơnăm hiăng krâ djâ troăng lĕm”, ai mâu hnoăng veăng ‘no pêi tơƀrê, ai pơxúa tâ nếo vâ mơjiâng khu lêng rơkê khât, hlối rơdêi, pê klêi tŭm mâu tơdroăng ki châ pơcháu, tơxâng ƀă tuăn loi dêi Đảng, Tơnêi têa ƀă kuăn pơlê.